E 1.7 miliona tala se vaega tupe ua faamaonia mai e le faigamalo a le National, o le a tuuina atu lea mo le Montie Cecilia Housing Trust. Sa faamaonia mai e le susuga i le alii faipule o le itumalo o Maugakiekie, Sam Lotu-Iiga i se pepa o faamatalaga sa tuuina mai i le Samoa Times, atoa ai ma se feiloaiga i luga o le telefoni i le faaiuga o le vaiaso. O le vaega tupe e pei ona faamaonia mai, o se tali a le malo i le talosaga sa tuuina atu e lea nofoaga, o loo fesoasoani mo aiga e vaivai le tamaoaiga, aemaise o le tau sailia o ni fale e nonofo ai.
O le Montie Cecilia ua savalia nei i le 20 tausaga o loo tautua pea, i le ofoina atu o fesoasoani mo aiga ua faigata tele ona maua ni fale e nonofo ai. E le gata i lea, ae faapea foi ona ofoina taumafa, lavalava e oo lava i meafale mo aiga o loo sulufai atu i ai. O se nofoaga o loo faatautaia e le faalapotopotga tuufaatasi a Sister of Mercy, ma Marist Brother, i lalo o le faamalumaluga a le Ekalesia Katoliko. O le 1982 sa faavae ai, i lona nofoaga muamua i Hillsborough i Mt Roskill.
E aupito i maualuga lava le fuainumera o aiga Samoa e nonofo ai i totonu o lenei nofoaga. O le tele o aiga mai le atunuu, e manuia i le avanoa o faiga paaga a Samoa ma Niu Sila e ala i le kuota i tausaga taitasi. E ui ina malaga mai ma ua faamanuiaina foi i le tulaga o galuega e galuule ai, peitai o le faafitauli aupito i faigata tele, o le tau sailia o ni fale e faamautu ai.
O isi aiga ua fiu e faatali talosaga i fale o le malo, peitai o le faafitauli masani lava o lea matagaluega, o le tuai tele ona tali ane i talosaga. O le toatele o aiga e le taitai ona gafatia e tupe maua le totogi faavaiaso o fale mau totogi i luga o le maketi. O le faafitauli numera muamua lea e mafua ai ona faatupulaia pea le fuainumera o aiga, o loo sulufai atu i le Montie Cecilia mo se fesoasoani.
E manatu le Samoa Times e tāua tele le fesoasoani a le malo ua fuafuaina ai le seleni e pei ona sauni e faamatuu ane mo lea nofoaga, ona o le toatele o aiga o le atunuu o loo nonofo ai. O ni tausaga ua mavae sa asiasi ai foi le sui o le Samoa Times i le nofoaga lava lenei, ona o nisi o le mamalu o le atunuu sa manaomia nisi o manaoga faapitoa, ma o le isi lea faamaoniga o le tāua tele o le galuega a le Montie Cecilia. O se suesuega a le tatou nusipepa i le tāua tele o le tulai mai o lenei mataupu, sa mafua ai loa ona taumafai e fesootai ma le pule o le nofoaga i Magele.
O le saunoaga a le tamaitai pule o lea nofoaga Elaine F Lolesio, i se talanoaga ma le tatou nusipepa, ina ua fesiligia, mo le faaaogaina o le seleni e pei ona faamaonia mai e le malo.
Faafetai mo le avanoa, o le vaega tupe e pei ona e fesiligia, e lei oo mai i le taimi nei, masalo o se taimi o le vaiaso fou o le a agai atu ai e sainia pepa mo le tuuina mai. Ae o le fuafuaga ua mae‘a ona faataatia mo le faaaogaina o le seleni, o le a toe fausia ai nisi fale fou, ma o fale o le a fausia o le a faasee i ai aiga o loo nonofo i totonu o le lotoa i le taimi nei, ae sei tau faasolosolo mai le isi vaega o loo i le lisi faatalitali.
E fa isi fale a le Montie Cecilia o loo iai i le taimi nei, ma o ia fale e tolu ma le fa potu moe, ma o loo nonofo ai nisi o aiga sa inei muamua i le lotoa. Atonu o le ata foi lea o le a fausia ai fale fou ua fuafuaina, o le fa lava ma le tolu potu moe. E fuafua i aiga o loo gasolo mai, e fai lava si toatele, aemaise ai o tatou aiga Samoa, ma le Pasefika, e fai o le toatele ae fiafia e nonofo faatasi uma.
O Magele lava ua fuafua e fausia ai fale e pei ona ta‘ua, ona o lenei le itu, e fai lava si toatele o aiga o loo manaomia le fesoasoani. O le ala foi lea sa toe sii mai ai le auaunaga mai Mt Roskill e pei ona sa iai muamua. O le fesoasoani muamua lava lea o loo ave i aiga o loo autovaa mai, o le tau sailia o fale e nonofo ai, ma taumafai foi e faatotoga nei fale pe a maua.
Samoa Times: O a nisi fesoasoani o loo ofoina mo aiga ma tagata lautele o loo sulufai mai, ae pe iai se taimi faatulagaina e nonofo ai aiga i totonu o le lotoa a o tau sailia ni fesoasoani?
Elaine Lolesio: E 12 lava masina e tuuina mo soo se aiga, ae le tamau ai pea i lea taimi faatulagaina, aua o nisi e na o le tai ono lava masina, ua maua le fale, o nisi foi e seasea lava ona oo i le umi e pei ona ta‘ua.
O loo matou galulue faatasi foi ma le matagaluega o fale a le malo, Housing NZ, ma e tele foi le fesoasoani o loo maua mai ai i le unaia o a matou talosaga, ina ia tali mai e tusa ma le taimi o loo manaomia.
O isi fesoasoani o loo ofoina i aiga uma lava e nonofo iinei, o le faia lea o matou aoaoga, e faatāua ai le tulaga o le faasoasoaina o tupe maua a le aiga.
E le gata i lea, ae o le faamalosia ina ia taumafai e totogi ni aitalafu o iai, ma fautuaina ina ia tau mamao ese mai le toe faia o nisi aitalafu ma tupe nonō. O le itu o fefaatauaiga, o auala e faamausali lelei ai ulugalii mai faafitauli, e le gata i le va faaleulugalii, ae o le va foi ma le fanau.
O loo iai foi le matou aoga mo tamaiti, (play group) e sauni ma tapena ai i latou mo aoga amata.
O soo se aiga foi o le a tuua le nofoaga lenei, pe afai ua maua se fale o le a faamautu i ai, e matou te fesoasoani foi i ai mo meafale ma totoga o le fale, e oo lava i lavalava. O le naunautaiga lava ina ia o ese atu ae ua maua ni aseta ma ni meatotino e fesoasoani e amata ai o latou aiga. O le aogā o aoaoga o loo faia ina ia o ese atu ma iinei, ae ua maua foi le agavaa ma le poto e fuafua ai ma fai faatatauga a aiga. O fesoasoani uma lava nei o loo matou ofoina mo aiga o loo mafuta i lenei lotoa.
Sa maua foi le avanoa e talanoa atu ai le Samoa Times, i ni tina se toalua, o aiga sa nonofo ai i le nofoaga lava lea i tausaga ua mavae, aemaise o le isi o loo iai pea ma lona aiga i le taimi nei.
Ana Tiumalu
O au ma lou aiga sa matou nonofo muamua foi i totonu o le lotoa lenei a le Montie Cecilia, ina ua faatoa matou taunuu mai i Samoa ma lou toalua ma lau fanau. O se nofoaga sa faamanuiaina ai i matou, ona o le tele o ni fesoasoani sa matou maua ai a o matou iai. E oo lava ina maua le matou fale, ona o le finau ma le faatauanau o le tamaitai pule ma le au faigaluega. O le tele lava o taimi, e pei lava o lou aiga moni lea ta te iai, ona e leai lava se mea e le maua, aemaise lava o le agalelei ma le tausaafia, ma le vaaia lelei o matou ma o matou aiga.
E toatele lava ni aiga sa matou nonofo iinei ua foi atu ma maua o latou fale ona o le galuega tāua a le nofoaga lenei. Ua le gata ai ia te i latou ae ua faailoa foi ia latou uo ma aiga, e pei foi o maua ma le ma fanau.
Ou te molimau lava au i le manaia ma le tāua o le galuega a le Montie Cecilia, ua faalelei ai foi o matou aiga.
O le tina ia Ana Tiumalu, e pei ona lomia lana faamatalaga, e ui lava ina ua o ese ma le nofoaga, ma ua nonofo foi i lo latou lava fale, ae peitai sa naunau tele lona loto e toe foi mai ina ua tau sailia se isi e nafa ma le vaaia o fanau, poo le play group.
O le toe foi mai o lea tina ua ofoina ai lona taimi mo le aoaoina o alo ma fanau a i latou i totonu lava o le lotoa. Sa ta‘ua e lea tina e ui lava ina ese lana matata o loo galue ai mo le tausia o lona aiga, peitai e le faagaloina lava le Montie Cecilia, ona o le galuega tele sa faia ia te ia ma lona aiga. O le ala lea ua fiafia ai lava e toe foi mai ma tautua e ala i lana auaunaga mo le play group a tamaiti.
Luisa Kavesi
O matou sa matou nonofo i Napier, ma o ina foi sa matou taunuu i ai ina ua faatoa matou omai mai Samoa. O le matou aiga sa faamanuiaina i le sei o le kuota, ma o Napier lava na maua atu ai foi le galuega. O le mafuaaga lea sa matou nonofo ai i lea foi vaega o le atunuu mo tausaga ua mavae. Ua mae‘a la le taimi faatulagaina o le konekarate sa maua atu ma matou omai ai. Ua matou see mai i Aukilani ona o le tau sailia o ni galuega e tausi ai aiga.
Ua taunuu mai, ae o le faafitauli ua faaletonu le nofoaga sa faamautu mai i ai, o lea la ua maua ai le fesoasoani e nonofo ai iinei. O le isi ou tauusoga sa nonofo foi iinei i tausaga ua alu, o loo ia talitonuina pea, ma talai i tagata le lelei o le nofoaga nei.
O ia sa ia faasino mai ia matou lenei nofoaga, ma o lea lava la ua matou nonofo ai ma le ma fanau e toalua, ma faatali ai ni galuega ma se fale matou te nonofo ai.
Ia o le tamaitai pule lava ma le aufaigaluega o le Montie Cecilia, o loo nafa ma le faagaioia o mea uma e pei ona manaomia.
O fautuaga uma lava ma faatonuga o loo tuuina mai o loo mulimuli lava i ai aua e matou te iloa ma le mautinoa e le faigofie la latou galuega o loo fai. O le tau sailia o galuega ma le sailia o se fale, aemaise lava o meaai ma lavalava.
Ou te molimau atu i lau susuga, o le matua lelei lava o lenei nofoaga, ua ta fiafia lava e nofo ai, fiafia foi si ou toalua ma le ma fanau.
E le galo le agalelei o lenei tautua, ou te talitonu e leai lava se aiga e o ese atu ma iinei e le o faamalieina ona o le tausia ma le vaaia o aiga taitasi, aemaise lava o tamaiti. Manaia foi polokalame ma aoaoga o loo faasoaosa mai mo i matou, ina ia iloa faaaoga le tupe, ma isi vaega o le olaga i lenei atunuu.
O le molimau a le tamaitai pule, o le toatele o aiga e tuua le nofoaga, o loo fesoasoani i ai i le tulaga o meafale ma isi. O aiga lotu uma o le Ekalesia Katoliko i Aukilani atoa, aemaise lava o aiga o le au mauoloa, o ina e aumai ai meafale ma le tele o mea totino. O mea uma ia o loo faasoaosa atu mo aiga o loo matou mafuta ai, aemaise o le taimi o le a agai atu ai mo se fale fou e nonofo tumau ai. O le tele o aiga e laki, aua o nisi o meafale e pei lava o ni mea fou e lei faaaogaina, e oo foi i ogaumu, pusaaisa, masini ta lavalava aemaise foi o lavalava.
E toa sefulu ma le lua aiga e mafai ona nonofo i totonu o le lotoa, a o le taimi nei e tusa ma le toavalu o aiga o loo iai, o aiga Samoa. E iai le faamoemoe o nisi o nei ulugalii ma fanau, masalo o le a manuia i fale fou o le Montie Cecilia lea o le a fausia i le vaega tupe e pei ona faamaonia mai e le malo. Sa ta‘ua foi e le tamaitai pule, o loo avanoa pea mo ni aiga o loo fia maua se nofoaga e faamautu i ai. O le tuatusi o le 30 Windrush Close, Mangere. O le telefoni 09 275 661, poo le silasila ane i le www.montiececilia.org.nz.
