Talofa lava, malo le soifua manuia. Viia le Atua mo lana pule faasoasoa mai i lo outou soifua, ma so matou malosi, ua mafai ai pea ona faaauau galuega fai mai lena vaiaso seia oo mai i lenei foi vaiaso. O le toe faaauauina lenei o le soifua galue, atoa ai ma isi vaega o le soifuaga o le afioga ia Leaupepe Taulapapa Faimaala Fuatino Vaovasamanaia Filipo (Phillips).
Sa gata mai le faitauina o le soifua galue o Faimaala, a o avea o ia ma tamaitai tausimai pasi, ma o lana galuega faapolofesa foi lea sa tautua ai i le atunuu, ma fesoasoani ai mo lona aiga.
O le tausaga e 1970, o le taimi tonu lea na faatoa ulufale ai Faimaala i totonu o upufai o malo poo faiga faapolokiki. O le tausaga tonu foi lea na suia ai ma lana galuega, ina ua filifilia e le itumalo o Palauli i Sisifo, e fai ma o latou sui i totonu o le fono faitulafono a le atunuu, i le malae o Faautugatagi i Tiafau.
O le ulufale ai o Faimaala i upufai o le atunuu, o se avanoa maualuga ma tulaga ese i talafaasolopito, ona o se tamaitai, a o se tina muamua foi lea, ua faamanuiaina i lea tulaga. E le gata o se matatia i le atunuu, a o se vaega tāua foi i lona soifua auauna, talu ona galue.
A o galue ai o se sui faipule mai itumalo e pei ona ta‘ua, o le taimi tonu foi lea sa ia ausia ai se isi matatia fou i lona soifuaga galue. Sa tofia ma filifilia o ia e avea ma Sui Fofoga Fetalai o le maota fono, ma e tulaga ese foi lea tofiga mo ia, aua o se tamaitai ma o se tina muamua lea sa umia lea tofiga tāua tele talu ona amata le malo tutoatasi, ma pulea e Samoa ona lava faiga faavae.
O le seei i le nofoa Sui Fofoga Fetalai o le maota, e seasea lava ona oo i ai le itupa vaivai, pei ona faalupe ai tina ma tamaitai o le atunuu. Talu mai lena taimi sa umia ai le Sui Fofoga Fetalai e oo mai lava i le taimi nei, e lei mafai e se isi tina ona toe maua lea tofiga. E foliga mai o se tina muamua sa faamanuiaina i lea tofiga tāua, a o se tina mulimuli foi e oo mai i lenei vaitau.
O le tasi o vaega tāua mo le silafia, o Leaupepe ma lona alii o Vaovasamanaia, sa iai faatasi i le taimi e tasi i totonu o le Palemene. O se ulugalii muamua foi lea sa iai faatasi i totonu o le Palemene o Samoa i lea vaitaimi.
E tolu nofoaiga sosoo faapalemene sa nofoia ai e Faimaala le nofoa o le maota o se sui a faipule. E lua nofoaiga mai Savaii i le suafa Taulapapa, ae tasi ia Fasitoo i lona suafa Leaupepe. O lana nofoaiga muamua o le tausaga e 1970, a o le faatoa tolu ai lea o paeaiga talu ona tutoatasi le malo mai le 1962.
O le mae‘a o nofoaiga e tolu sa avea ai ma faipule, ma ausia ai ni matatia se lua i lea taimi i lona lava soifuaga, ona malolo ai loa lea mo le tautuaina o le aiga ma le nuu. O le taimi foi lea sa taulai ai lana silasila i tuite ma galuega faatina o se aiga Samoa, ae faaauau pea galuega a lona alii Vaovasamanaia Filipo.
