Ua faatali nei le Maota o Sui i Amerika Samoa mo se finagalo o le Maota Maualuga, le Senate o le teritori e faamautu ai le tulafono taufaaofi ina ia taofia le taumafa tapaa i nofoaga lautele.
O le vaiaso na tea nei lea na pasia ai e sui a faipule o le Maota o Sui i Fagatogo le tulafono taufaaofi, ina ia taofia ai le taumafa tapaa i nofoaga faitele, e amata mai i taavale lau pasese ma pasi, o faleaiga ma isi nofoaga tapunipuni e masani ona potopoto ai tagata lautele.
O le faasalaga ua faamaonia e le Maota o Sui o le $50 (tala Amerika) ma o le a faaopoopo ia faasalaga pe afai e faaauau ona faasala i latou e maua o loo faia lava lea faiga. E le gata i lea ua faapea foi ona faamalosia ai ma le taofiga o le ulaula i totonu o Ofisa ma fale faigaluega.O Samoa na faamamalu ai nei tulafono e pei ona vaaia i isi atunuu o le lalolagi i le lua lenei o tausaga. O tapu na amata mai lava i nofoaga faitele e pei o Lotoa uma o Falemai i Upolu ma Savaii. Na sosoo ai ma tapu na faamalosia i totonu o pasi ma taavale laupasese.
Na faapea foi ona faamalosia ai ma le faasa o le ulaula i ofisa a le Malo ma Faleaiga faapea ai fale kalapu ma fale ava.
O faasalaga i lenei suiga i Samoa e faamoemoe lava i le nofoaga o loo faatino ai lea solitulafono.
O Samoa le isi atunuu ua matauina le maualuga o le numera o ona tagata ua tagofia le tapaa, ma o se faiga lea ua tali atu ai le Malo i le faaopoopo ai pea o gasegase ua mafua mai i le tapaa.
Ua faapea foi ona siisii pea le tau o le sikaleti atoa ai le ava malosi ina ia mautinoa e faaitiitia le numera o i latou e tagofia le tapaa i Samoa. Mo Amerika Samoa, ua faatali nei la le ioega a le Senate a o lei aloaia le suiga ua iai nei le tulafono e taofi ai le taumafa tapaa i nofoaga e pei ona ta’ua.
