O le vaiaso ua tuanai na afea ai Niu Sila e le Pulega o Tagata Tafafao mai i Samoa ona o le manaoga ina ia talanoaina le tulaga o iai lenei atinae ma le manaoga ina ia unai pea le numera o i latou i lenei atunuu e fia asiasi atu i Samoa. Talu ai le mae’a o le sunami lea na faaleaga ai nisi o faletalimalo tetele faavaomalo i Samoa aemaise Apitaga Tumatafaga.
Ua savali nei le lima (5) masina talu ona feagai Samoa ma lea faalavelave tele ma ua vaaia foi le toe faaleleia o nofoaga faapea na faaleagaina ma ua toe amata gasolo atu tagata tafafao.
O nofoaga e pei o le Taufua Beach Fales, ua manino le atoa o le tausaga lenei o tumu ona o le tele o i latou ua talosaga atu avanoa mo tafaoga i lea nofoaga.
Ua toe foi lava i le pisi lea atinae peitai, e le o faletalimalo uma ma apitaga tumatafaga uma o loo maua le faamanuiaga lenei.
O le malaga mai la o le Pulega o Tagata Tafafao a Samoa, lea e aofia ai le afioga i le Minisita, Misa Telefoni, le afioga i le Ofisa Sili o le STA, le afioga Matatamalii Sonja Hunter ma nisi o le Ofisa, o le tau saili lea o auala e mafai ai ona saga faatosina atu tagata mai Niu Sila e afea Samoa o se nofoaga ua taulai i ai tafaoga a le toatele o tagata asiasi.
O le fonotaga lea na vaavaai ai i taumafaiga e pei o feau faalauiloa na faaali i luga o televise, leitio faapea luga o nusipepa i Niu Sila nei aua lava le unaia o lenei faamoemoe.
O le tausaga na tea nei na faaopoopo ai ofisa e pei o le ofisa o le STA i Niu Sila, i atunuu i Europa ma Amerika ona o le taumafaiga lava a Samoa e saga faalauiloa Samoa o se atunuu e maualuga i le atinae o turisi i lenei itu o le Pasefika.
O le tali e pei ona vaaia o le toatele lava o tagata tafafao atu i Samoa e mai i Niu Sila. O le toatele foi o i latou ia o tagata Samoa ua asiasi atu i Samoa ona o faatasiga a aiga faapea faalavelave faaleaiga e pei o maliu, faaipoipoga, saofai ma faaulufalega.
O le atinae o tagata tafafao mai o le atinae aupito i tupe silia lea i tupe maua a Samoa aua lona tamaoaiga i tausaga taitasi.
Ua unai foi se polokalame i Samoa e le Faalapotopotoga a Malo Aufaatasi ina ia faamalosia ai puipuiga o faletalimalo ma apitaga tumatafaga i taimi o faalavelave faalenatura e pei o le sunami.
O ni gaioiga ua faia talu mai le sunami o le tausaga ua tea.
O lenei polokalame ua ave ai le faamuamua a le UNDP i atinae tau turisi i afioaga i tua ma o loo faatupe e lea faalapotopotoga polokalame aua le malosi o se tali atu a Samoa e ala i nei pisinisi i taimi o faalavelave faafuasei.
