O le Aso Faraile na tea nei, 21 Setema sa tatala aloaia ai le polokalame ua faaigoaina o le ‘Career Navigator Programme’ i totonu o le kolisi maualuga a Manurewa High School.
O lenei polokalame o loo faafoeina e le tautua a le faalapotopotoga ua ta‘ua o le Foundation for Youth Development, i la latou galuega vaavaalua ma le pulega poo le Komiti Faafoe a le Manurewa High School. Ua faapitoa lenei polokalame mo le fanau o loo iai i le vasega Year 11, Year 12 ma le Year 13 i totonu o le aoga lenei.
O le faamoemoe o lenei taumafaiga, ina ia mafai ona maua se fesoasoani mo fanau aoga a o sauni e oo atu i se isi laasaga o lo latou lumanai, e pei o galuega talafeagai mo i latou aemaise foi o le toe faaauau ona aoaoina i totonu o iunivesite ma isi aoga maululuga o loo aoaoina i tomai faapitoa.
O le Manurewa High School e toatele lava le aofaiga o fanau Maori ma Pasefika aemaise Samoa o loo aoaoina ai.
O le polokalame o lea aso sa tatalaina aloaia i se saunoaga faafetai a le susuga i le alii pule aoga o Salvatore Garguillo, e faatāuaina ai le sao tāua o le auaunaga a le Foundation for Youth Development i le fofoaina mai o lenei polokalame, aemaise foi o le tautua a le pisinisi a le Leighton Contractors o loo latou faatupeina lenei polokalame.
Sa saunoa foi le faletua ia Marion Short mai le pulega a le Foundation for Youth Development, e faafetaia ai le aoga a Manurewa High School ona o le avanoa mo le faatinoina o le polokalame.
E tele auaunaga faapisinisi ma sui mai matagaluega a le malo sa auai ai, e pei o sui mai le Matagaluega o Leoleo, auaunaga mo le sueina aemaise o le saunia o fanau mo galuega e pei o le Careers New Zealand, ADECCO Recruitment Agency ma le New Zealand Drug Detection Agency aemaise foi o sui mai isi aoga maualuluga e pei o le Manukau Institute of Technology sa faatalanoaina le tāua o le ‘aua ne‘i muta le naunau ina ia aoaoina i tomai faapitoa e pei o le faieletise, inisinia ma le fausiaina o fale faapea auaunaga faaturisi aemaise le tele o isi matata eseese.
O le saunoaga autū o lea aso sa matuā vaaia le luitauina ai o le faafofoga a le fanau aoga a Manurewa High School ma ē sa auai i lea faamoemoe, o le saunoaga lea a le tamaitai Samoa o Bernice Mene, o se tasi o tamaitai iloga i le taaloga o le netipolo. Saunoa Bernice i le tāua o le iloa e le tamaitiiti o se goal poo se faamoemoe autū o loo ia manao e ausia.
A mae‘a ona faamautinoa le faamoemoe autū o loo fia pa‘i iai le olaga tauivi o se tama ma se teine aoga, e tāua ona galue ma tepa taulai aemaise o le faamanatu pea o lea faamoemoe autū, e ala i le galueaina o polokalame e pei ona iai le ‘Career Navigator Programme’ ua amatalia nei i totonu o le aoga e fesoasoani ai i le fanau ina ia ausia a latou moemitiga.
