O le Aso Toonai na tea nei na taunuu mai ai i fanua le aulakapi a le Afioaga o Moataa auā le faamoemoe o le taitoafitu a Melepone Samoa e faia i le Aso Toonai 29 o Setema. O lenei valaaulia na auina atu mo Moataa ina ua siamupini i le tauvaga taitoafitu i Samoa faapea le sefululima o le 2012.
E pei ona silafia o le alo iloga foi o le Afioaga ia Fainuulelei Matamua Filipo Saena o loo alala nei i Vitoria ua avea nei ma Faatonu o le Taamilosaga i Melepone.
O sui o le taitoafitu a Samoa i le au lenei a Moataa e aofia ai Lolo Lui ma Falemiga Selesele aemaise sui o loo vaaia le mataina o la latou tausinio e pei o le sefululima a le kalapu lea na suipi i lenei tausaga.
O se taui maoae le masii mai o Tama o le Togoaasa ina ua toe ausia i lenei tulaga maualuga sa masani ai lana aulakapi i le tele o tausaga ua tuanai. O loo malaga mai ai ma le afioga i le faipule ia Lenatai Victor Tamapua.
O le faiaoga o le Susuga Malo Nofoagatoto‘a ae peitai o le taitai malaga o le susuga Tuvao Palepua ma le fomai le afioga ia Dr Paniani Patu o loo faamautu i Sini nei. O le maota o le Afioga Seiuli Manu Kalifa Fualau ma le faletua ia Mate na faamautu mai ai le toaluasefulu muamua na taunuu mai i le Aso Toonai mo se taumafataga, ae taunuu mai le isi toaluasefulu i le Aso Lulu nei.
O loo tali api i aiga tama o le au seia tuua mo Melepone ona toe taliu mai ai lea i le aso muamua o Oketopa ma tuumuli ai mo Samoa i le aso ono. O loo fuafua e faia se taaloga o le sefululima mo Sini nei.
O le au lava lenei o loo auai ai nisi iloga i Samoa e pei o Levini Sasa, Lipine Fualau i le Hooker. O Lipine Fualau o le uso laiitiiti o Manu Seiuli Kalifa Fualau ma Steve Fualau o le Manu Samoa ma Canterbury i Niu Sila. O le alii talavou ia Taua Sione i le tulaga 2nd 5/8 na iloga lana taalo i Samoa.
O le alo o Oka Fauolo (RIP) ia Peteli Oka Fauolo o le vaai i le tulaga o le 2nd 5/8 ma o loo aoga o ia i le Iunivesite a Samoa. O le alii o Ese Lui o le uso laiitiiti o Opele ma Lolo Lui i le tulaga 1st 5/8 o se sui foi o le 1st XV a le Kolisi o Samoa.
O Ilalio Palepua o loo auai mai i le fulupeki ma le 1st 5/8, Kaiva Asiasi i le uigi, Faafou Faamati i le centre, Faranisisi Togisa i le loka, ma Faitiu Sione i le ‘afa.
O le Aso Sa na auai atu ai le aumalaga i le sauniga Lotu a le EFKS i Fairfield o loo galulue ai le Toeaina i le Faatonu Rev Elder Peleti Toese Toailoa ma le faletua ia Senetenari.
O loo iai foi i lenei Ekalesia se sui muamua o le Kalapu a Moataa ma le taitoafitu a le Manu Samoa le susuga i le Faifeau ia Rev Mose Galuvao ma le faletua ia Betty Galuvao.
Mo nisi faamatalaga valaau Aliimuamua Roma Penita 0432585056 poo Seiuli Manu Kalifa 0421715668.
