A o silasila atu i TV ma luga o upega tafailagi i le faatuputeleina pea o vevesi o nisi o atunuu o le lalolagi, e lagona le alofa i le leai o se saogalemu ona ole vatau o ia atunuu, “ae o le fesili, o saogalemu pea ma toafilemu lo tatou siosiomaga”?
E tāua tele ma onomea le faaāvaāva o taimi faaalu mo le Alii ina ia saga faamausaili ai le mafutaga vavalalata ma le Atua i taimi uma, a o iai i taimi faigata ma le utiuti o lenei soifuaga, e mautinoa i le vavave o taimi ae lei taitai uma ni fuafuaga fai. O loo sologa lelei le faagaioiga o le Vespers faaletausaga a autalavou SISDAC i Kuiniselani i lona vaiaso lona lua.
O le fesuiai o le faafofoga i polokalame ma faalaeiau aemaise timaiga a le tupulaga na fai lea ma auala na tatai atu ai lagona o le toatele e molimauina tala faale-Tusi Paia, pesepesega ma polokalame sa faatinoina i le Aso Faraile 21 o Setema.
E lua autalavou sa faisao mai le Region a Simeona, o susuga i faafeagaiga o loo faamalumalu e iai Ps Togamau ma le faletua ia Ianeta Tuia (Ekalesia i Kingswood) a o Ps Faamalologa ma le faletua ia Tamara Fuesaina (Ipswich).
O le Region foi lea o loo iai le faatamā o le autalavou a Kuiniselani, le susuga i le Toeaina ia Setiu Iakopo Togipau ma le taitai autalavou, o le faletua ia Ianeta Tuia faapea nisi o le komiti.
O ia lava faatalaleleiga e faatuputeleina ai le soifua tapuai ma tapenapena ai le soifua o le tagata lava ia i aso faigata ua tau lata mai, au ā e faigata na talitonu i valoaga ona ole solosolo lelei o le soifuaga ae lei mu le foaga.
O Iesu lava na fetalai, “O lenei, ai sē na te ta‘uta‘u au i luma o tagata, o au foi ou te ta‘uta‘uina o ia i luma o lo‘u Tamā o i le lagi” (Mataio 10:32).
