“E lē sa‘o tuua‘iga a le SISDAC i le tuai atu o le tineimu”,..Seve Tony Hill

O le tali mai lea a le Ofisa Sili o le ofisa o tali mo faalavelave faafuasei poo le Tineimu, Seve Tony Hill i se tuua‘iga a le taitai o le Ekalesia Asofitu Tutoatasi i Samoa (SISDAC), Pastor Tupou Tufuga Lauifatate‘o, e tusa ai ma le tuai atu o le auaunaga a le Tineimu i le malaia ua faatama‘ia ai le malumalu o le SISDAC i le taeao o le Aso Tofi o le vaiaso nei.

Faaalia e Pastor Tupou, e tusa o le tea teisi o le itula e fa i le vaveao (4am) na faafesootai ai le Tineimu ae toe kuata i le lima (4.45am) faato‘ā taunuu atu.

“Na taunuu atu ni taavale (loli) fuimu se lua ma toe foi, ma sa fesiligia pe aisea ae tali mai e lē lava le vai,” o se saunoaga lea a le taitai o le Ekalesia Asofitu Tutoatasi Samoa.

Na ia ta‘ua foi, e toe oo atu taavale ua sasao ma faatetele le mu, ma pau le itu na ia silafia e mamao le vaega na toso atu agai i ai faagaau a le Tineimu, o le maota lea o le Ekalesia Katoliko i Taufusi. Faaalia e le Ofisa Sili o le Tineimu, e lē sa‘o ia tuua‘iga. “Sa vave lava ona tali ane le Tineimu e tusa o le faalavelave na tulai mai ma soo se faalavelave faafuasei lava e logo mai, o loo vave lava i ai le tali a le Ofisa,” o se saunoaga lea a Seve.

Na ia ta‘ua foi, e faatulagaina lava le tele o le vai mo taavale poo loli o loo faaaogā, ma o lea na toe agai ai taavale mo se vai e tape ai le mu. O le masani e pei foi ona vaaia i tausaga ua tea i faalavelave faapea e tulai mai, e agai le ofisa o le tineimu i se nofoaga lata ane mai i le nofoaga tonu lea e tulai mai ai se malaia poo se mu ma ta‘i mai ai le suavai. O le vai la lea na manaomia i le vaveao o le Aso Tofi o le vai mai i le Ekalesia Katoliko i gauta laititi atu o le nofoaga o le SISDAC lea na mu.

E tusa ai ma faamatalaga e faapea o le malaia na mafua mai i se tulinamu a le ulugalii o loo leoleopo i le nofoaga o le Ekalesia, na ta‘ua e Seve, e lē o mautu mai i le taimi nei le mafuaaga o lea faalavelave ma o loo faagasolo i ai suesuega a le Ofisa o Tineimu faatasi ai ma le Matagaluega o Leoleo. O se faamatalaga a le susuga i le faafeagaiga Pastor Tupou, o i latou ma lana fanau sa momoe i luga o le fale lea ua aafia i le malaia.

O se tasi o a‘oa‘o na usu ane mo tapenaga o le suegatupe a le Ekalesia, na fafagua le faafeagaiga ma lana fanau ma fai i ai e tapena ese ma le fale ua mu. Sa faanatinati ane i lalo ae peitai o se tasi o le fanau, sa moe i luga lea na puna ifo i lalo ina ua ia vaaia le asu ua oo atu ae e lei taunuu ane lava le Tineimu ua mae‘a ona faafesootai.

Faaalia e Pastor Tupou, o loo masalomia o ni uaea i totonu o le fale lea na mafua ai le mu ae o nisi mafuaaga e pei ona faasalalau i luga o nisi o ala faasalalau e lē o maua.

“E tusa o le $5,000,000 ($5 miliona) le tau aofai o meatotino faatasi ai ma le fale, ua faatama‘ia i le malaia,” o se saunoaga lea a le susuga i le faafeagaiga. Ua ia fautuaina foi le mamalu o le Ekalesia, e lē o tuulafoaiina i latou e le Atua, ma ia avea lea ma laasaga fou, o le a fausia ai foi se isi fale tele o le Ekalesia Asofitu Tutoatasi i lea nofoaga mo le faatinoina o le galuega a le Atua.

O le a faaaogā le malumalu i Laulii faapea Vaitele Fou mo tapuaiga a le Ekalesia ae o le mataupu i le malaia ua aafia ai le SISDAC ua taatia atu i le Ofisa o le Tineimu faapea le Matagaluega o Leoleo mo suesuega.