E mālie eseese fati o pese ma upu o loo tatala mai ai lagona o le au fatupese.
O nisi foi taimi, e muliai faalogoina le leo o se pese, a o se upu poo se faaupuga ua faatomua ai se pese, e muai momoli mai ai le feau lea o le a lagi mai i se nota e mālie i le faalogologo.
O lea foi ua amata ona faatauina i Aotearoa nei le CD poo le tautua pese a le alii o Eterona Matamua Fiu Puni Ioasa. O le CD lona 4 lenei a le susuga Eterona ua faaigoaina, “Fuli i Fafo”.
Saunoa Eterona, ua ia filifilia lenei autū, ona e iai nisi o uiga poo faiga foi ua amata ona aliali mai lenei foi talutalufou, lea e moomia ona toe fuli ese pe fuli i fafo.
O le afiafi o le Aso Toonai na tea nei, na faia ai se faafiafiaga a Eterona e tatala aloaia ai lana CD i le kalapu faafiafia o le Parataiso i Otara. Sa faafiafia ai foi nisi o tamafanu a Samoa ua lauiloa i lea lava taleni o le pese, aemaise faafiafiaga a le faletua ia Sia ma lana ausiva, le “La o Samoa”.
O Eterona e mai le afioaga o Salelologa ma Nofoalii. O isi ana CD muamua e tolu sa tatala lava i Samoa. Vol 1 (Faleolo o Malae o Loimata) Vol 2 (Feagaiga Faavae o le Alofa) Vol 3 (Nofoa Vaevaeloloa) ma le Vol 4 lenei ua tatala i Niu Sila, le “Fuli i Fafo”. E 12 pese o le CD, e suifefiloi pese Samoa, ma nisi pese palagi.
O le kamupani pue pese a le Ululama Recording i Magele na tuufaatasia ai le CD a Eterona.
O loo lagolagoina malosi le faamoemoe o lenei alo o le atunuu, e kamupani a nisi foi o tamalii Samoa, le G-Mana Wholesale Autos a le Afioga Galumalemana Tai Galumalemana, le “La o Samoa” a le faletua ia Sia Su‘a, ma le kamupani a le Tarnica Car.
