Na masii mai lava le afioga i le faipule, Galuvao Viliamu o le tamafanau lava mai Avao i Matautu Savaii, ma le faigamalaga mai Samoa ona o le manatu lava i le fia lagolagoina o le faamoemoe o si o latou alalafaga e ala i le latou tusigaigoa na faatanuuina i le Aso Toonai na mavae atu nei.
Sa auai mai foi le sui faipule o le Labour Party le susuga Hon David Cunliffe o le pitonuu o Avondale ma New Lynn, ona o le lagona lava lea o le fia faaoo ane foi o sona sao auā le faamoemoe e ala i le toe fia fausia o se malumalu lelei mo le faataunuuina o sauniga ma tapuaiga a le alalafaga ma le Ekalesia i Avao.
Na amataina foi le tusigaigoa i le momoli o mea i matautusa i le saunigalotu, ona faasolo ai loa lea ma le polokalame e pei ona masani ai aso faapenei.
E lagona le faagaeetia ona o le loto alofa ma le agaga foai o nai o tatou tagata e ui lava ina ua matuā faigata ma taugata le soifuaga ua iai nei, ae lē mafai lava ona faaitiitia ai le faatinoga o le soifua auauna ma le agaga fiafia e foai ona o le lotonuu ma le manatu i le Atua ma lona alofa, aemaise o le faatinoga o auaunaga i le soifua faaleagaga.
O foliga ia o se mafutaga maopoopo ma galulue faatasi tagata uma, auā na maitauina le maualuluga o fuainumera o le foai a matafale taitasi aemaise le toatele foi o le soloalofa atu e auala i tauaiga, o uo, paaga ma ē masani a alo ma tamafanau o le alalafaga na faaalia ia latou foai na sasaa atu ai lo latou agalelei i seleni na foaia ma mafai ai ona tauaaoina e le mafutaga se seleni tele e tusa ma le $83,000 (tala Niu Sila).
E lei itiiti la le faafetai ma le faamalo na molimoli mai e le sui o le mafutaga na faafetaia ai le maau ma le milomilosia agalelei o le atunuu, ia i latou uma sa auai ma fesoasoani i lenei faamoemoe.
Ona taape foi lea o le fuamanusina ma le malie auā sa matagofie foi le laualo na saunia lelei e le mafutaga auā le taumafataga o le aso.
