E lē o tulaga manuia le faatauina atu o le talo a le atunuu i supamaketi ma faleoloa sa tufatufaina i ai ina ua mae‘a aso e lima talu ona taunuu mai le container.
O se tala lata mai ina ua toe fesootai atu i le alii pule o le kamupani o loo nafa ma le maketiina o le talo, sa ia ta‘ua ai e iai nisi o faaseā a le atunuu sa faaoo ane i faleoloa ma nofoaga o loo faatauina atu ai lea taumafa a Samoa.
O ia faaseā ua lē o se tulaga lelei mo le taumafaiga o loo taumafai ai nei ina ia unai ma saga faalauiloaina le toe foi mai o le talo a le atunuu i Niu Sila lava ia.
E lē gata i lea, e lē manuia foi mo le taumafai ma le faamoemoe o le au faifaatoaga a Samoa, o loo auina mai le talo.
O le faamoemoe o le toe faafoi o le seleni mo le au faifaatoaga i Samoa, o le a lē mafai ona solosolo manuia ma lelei, pe afai ae lē taulia ma tele le talo e faatauina i maketi i fafo.
Saunoa le alii pule Sam Yip, e ui ina tuai le taulia o le talo i nai aso na taunuu mai ai, peitai o loo taumafai malosi pea i se mafai e fesoasoani ai ina ia taulia ma faatauina pea.
E tasi le pusa oloa poo le container talo mai Samoa na taunuu i Aukilani i le vaiaso talu ai. O le pusa oloa e tasi e tusa lea ma le limaselau taga talo na aumai ai.
O le aso lava na taunuu ai ma tatala lea pusa oloa, sa faapea foi ona gaioi ai ma le aufaigaluega mo le tufatufaina ma le faasoasoaina i supamaketi ma faleoloa mo le faatauina atu mo tagata lautele.
O le kamupani a le Mellow Foods Ltd, sa taunuu i ai le container talo, ma o i latou foi ia sa nafa ma le faasoasoaina agai i le maketi.
E tusa ai ma se faamatalaga a le alii pule o le kamupani, le susuga ia Sam Yip sa ia faailoa ai le taumafai malosi e unai le taumafa a le atunuu ina ia mautinoa e lelei sona tulaga i le maketi.
E lē gata i lea, ae ia faapea foi ona lelei se tupe maua, ina ia toe faafoi atu i le au faifaatoaga ma le au totō a Samoa, ma ia saga faatupulaia ai pea le fiafia ma le gauai e totō ma tapue le talo ina ia saga tele mai ai pea le sapalai mo le lumanai.
O supamaketi e pei o Countdown i Aukilani atoa sa faataape i ai taga talo mo le faatauina.
E lei tele ni faleoloa laiti sa maua se avanoa e tuuina ai le talo, ona o le manatu o le kamupani o loo feagai ma le taunuu mai o le oloa, e vave tele le faatauina pe a taunuu i faleoloa tetele faapea.
O le aso na sosoo ai o le Aso Lulu aso 24, na tiliva ai ma oo atu le tufa i maketi i le laumua i Ueligitone, sosoo ai ma Kalaisetete. O le itumalo o Hawkes Bay sa faaiu i ai le tufa ma le faatauina atu o le talo.
O le molimau a nisi sa faavelaina ma tofo le talo, sa ta‘ua ai le manaia tele ma le u‘au‘a lelei o le talo a Samoa. E lē gata i lea, ae ua mafai foi ona fai ma toomaga ona o le tau o loo faatauina ai i luga o le maketi.
O le talo piniki mai Fiti, o loo faatauina i le $3.99 i le kilo, a o le talo mai Samoa ua faatauina atu nei i le na o le $2.99 le tau aupito maualalo o loo faatauina ai.
O loo iai le faamoemoe a vave ona maua se tali lelei, ma manuia le taumafaiga mo le faatauina o le pusaoloa ua taunuu, o le a faapea foi ona vave le toe aumaia o le isi uta mo le fofoga taumafa o le atunuu ma i latou e fiafia i ai.
E malosi le talitonuga o i latou o loo tufatufaina ma faasoasoaina le talo i maketi, o le a sili atu ona manaomia ma vave le faatauina ma le taulia o le talo Samoa, nai lo le talo Fiti ma isi atunuu o loo auina mai i totonu o Niu Sila.
O se faiga faatauvaga faapea e manatu o le a manuia ai foi ma le au faatau latou ia, auā o le a pa‘ū maualalo ai le tau mo tagata faatau.
