O lea ua faailoa mai i se lipoti ua oo mai i le tatou ofisa i Samoa nei, ua iai nei se fautuaga mai i se Komiti e nafa ma le iloiloga o amio ma galuega faatino a Loia i Samoa, le ave o se mataupu na tagi atu ai se tasi faasaga i le Afioga Toleafoa Solomona Toailoa i le Faamasinoga.
O le iloiloga na uluai faia e le Komiti Faapitoa lea a le Asosi ma tālia ai se latou faaiuga, ma o lea la ua sau le faaiuga e tatau ona ave le mataupu mo isi iloiloga i le Faamasinoga.
E lē o tele se faamatalaga o maua mai e faatatau i lea mataupu se‘i vaganā ai le tulaga lea o se tasi lava na faapea ona faatautaia e le afioga Toleafoa Solomona ana mataupu lea ua talosaga mo se suesuega.
O se faamatalaga mai i le tamaitai loia o Rosella Papalii lea e Failautusi i le Asosi a Loia i Samoa, e lē mafai lava ona faia sana faamatalaga o se sui o le Sosaiete a Loia se‘i vaganā ua oo i le Faamasinoga le mataupu.
Na fesili le tatou ofisa ua tau lava o le ioe poo le leai pe ua faatu atu se tagi, o lana faamatalaga e leai se faamatalaga e auamaia seia oo le mataupu i le Faamasinoga.
O le faamatalaga la lea ua taunuu mai i le tatou ofisa, muamua e sa‘o o lea ua oo atu le talosaga i le Sosaiete a Loia; ma le lona lua, o lea ua mae‘a ona faia le faaiuga a le Komiti Faapitoa o galuega faatino a Loia ma ua sau ai loa ma le fautuaga poo le faatonuga foi e tatau ona ave le mataupu e faaauau i luma o le Faamasinoga.
O lea la e tālia le taimi e taunuu ai lea fautuaga pe oo foi le tagata lea e ana le tagi i luma o le Faamasinoga e faataunuu ai le tagi na muai ave i le Sosaiete a Loia o Samoa.
O le tasi lenei o mataupu e tusa ma le fa ua feagai nei ma le Sosaiete e faatatau i loia o loo tautua i Samoa ma e manino e tasi lea ua mae‘a ma ua aumai ai le faasalaga, o le mataupu lea ua tuli ai nei le sala faafalepuipui o le susuga Semi Samau.
O le lima tausaga o lona faasalaga lea lava e tālia se talosaga a lana loia ina ia tuli i Niu Sila pe a malaga atu lenei alii i sona taotoga moomia i le taimi lenei.
O le taotoga o lona fatu lea ua aumai le tusi poo le lipoti a le alii fomai o Dr Satupaitea Viali e moomia lava le ave o Samau i Niu Sila e faatautaia ai ona o loo feagai ma gasegase tuga o lona tino.
A o tālia ai lea faaiuga a le Faamasinoga e pei ona talosagaina, o loo faapea ona tuli pea le faasalaga o Samau i le toese i Tafaigata.
O isi mataupu o loo tālia nei ni iuga ae na faaauau lava le manaoga o le tamaitai loia o Rosella Papalii e lē mafai ona talanoa mai i ai seia mae‘a lelei lava ona iloiloina i luma o le Faamasinoga.
