O se taiala fou ua faataotoina nei i totonu o le EFKS i Aoteroa, na mafua ai le sauniga lotu i le taeao o le Aso Tofi 29 o Ianuari i le malumalu o le Ekalesia Faapotopotoga Kerisiano Samoa i Te Atatu.
O lea tapuaiga o le faalauiloaina lea o ni taiala fou ua faataatitia e le komiti faafoe auā le atinaeina ma le alualu i luma o le galuega a le EFKS i Niu Sila.
Ma o lenei komiti faafoe ua uma ona resitalaina faaletulafono e le malo, ma ua maua ai foi ma le avanoa e maua mai ai le fesoasoani mai le malo mo le faatinoina ma le faaleleia o vaega taitasi a le Ekalesia aoao e pei o aoaoga, aganuu, tulaga tau i galuega ma le faaleleia o vaega taitasi auā tupe maua a le Ekalesia.
O le manulauti o lenei komiti faafoe o le manuia lautele ma le alulau i luma o tagata lolotu, aemaise o le atinaeina o aiga lotu i le itu i le tino faapea foi ma le itu faaleagaga.
O susuga i faafeagaiga uma ma o latou faletua o le ekalesia EFKS i Aoteroa na auai i lea sauniga, faatasi ai ma sui o aulotu taitasi. Sa maualuga foi lea aso ina ua mafai ona mafuta atu i ai le Konesula o le malo o Samoa le afioga ia Faolotoi Reupena Pogi, faipule ia David Cunliffe, Hon Alfred Ngaro, tamaitai faipule o Jenny Salesa ma le tamaitai faipule o Carmel Sepuloni.
O le faafeiloaina o le mafutaga sa nafa lea ma le susuga i le faafeagaiga ia Rev Dr Featunai Liuaana o ia foi o le fofoga o le aso, ae o le taitai o le sauniga na faatinoina lea e Rev Elder Tumamā Vili.
O le faamatalaina o le EFKS NZ Trust ma lona sini autu na saunoa i ai Rev Nove Vailaau, a o saunoaga autu o le aso na tulai ai Hon Alfred Ngaro ma le afioga i le Konesula o Samoa ia Faolotoi Reupena Pogi.
O le taitaifono o le EFKS NZ Trust ia Rev Elder Lucky Slade na saunoa faapitoa e momoli le agaga faafetai i sui o le malo na auai, faapea susuga i faafeagaiga ma o latou faletua aemaise o le auvalaaulia na molimauina lenei sauniga faapitoa.
O le mae‘a o le sauniga na faatino ai loa le ‘ava o le feiloaiga e le EFKS i Te Atatu, ma sosoo ai loa ma le taumafataga, o faafiafiaga o le aso na faafiafia ai le autalavou EFKS Mt Roskill, EFKS Sandringham Youth ae taualuga e le autalavou mai Te Atatu.
O upu mulimuli na toe saunoa i ai le fofoga o le aso ia Rev Dr Featunai Liuaana ma faaiu ai loa i le tatalo na saunia e Rev Elder Faatulituli Setu.
