E matuā leai leai lava se Tulafono o fuafua e teuteu ai le Tulafono o Tusifolau e faatau ai ni Tusifolau. Tasi lena tuuaiga faavalevalea tele, e na o mea valea e fai e lena nusipepa. O le tuuina atu o Tusifolau, o loo faatonutonu e le Tulafono o Tusifolau.
O le itu o loo sese ai i Sini, pe o loo taufaasese ai lena nusipepa ua pa‘ua‘i i lea uiga ona o le Tulafono tau faatosina mai o pisinisi tetele mai fafo e pei o le Yazaki e o mai e fai ni a latou pisinisi i Samoa, e maua ai ni galuega mo tatou tagata.
Ae faatosina la i le tuu i lalo o le taimi faatali ai mo le avea ma sitiseni Samoa mai le 5 tausaga o loo iai nei le 3 tausaga mo latou e ana ia pisinisi. Ia maua tele ai galuega faaopoopo mo fanau aoaoina a Samoa. O lea faiga o loo fai e le tele o atunuu i le agaga lava e tasi e pei o tatou. Fai e Niu Sila, Ausetalia, Fiti ma i si. Ma e tāua tele mo Samoa ona e faaleai ni atinae tetele mai fafo ua tulai mai ai na o le Yazaki ma le Faletalimalo tele o le Au Papua Niu Kini o loo fau nei i Taumeasina. A uma ane le isi 50 tausaga, ua toe faaopooopo mai se isi 3 pe 4 ni pisinisi faapea, ua tatau loa ona tatou pepese aleluia.
O faafitauli o loo feagai pea ma Samoa i le tulaga o ni pisinisi tetele e faatosina mai, o le toagaogao o le tatou faitau aofai (small market) ma le tau mamao mai le tele o atunuu e maketi i ai tatou oloa, pe ana iai lava nisi e fiafia i lea foi ituaiga faatosina o le sitiseni e faafaigofie ai ona Malaga e asiasi i isi atunuu o le lalolagi o loo iai a latou pisinisi ae lē fia nofomau i Samoa nei.
O uiga masani ia o loo tupu i atunuu o loo fai foi a latou faatosina e faaaogā i ai sitiseni.
Tele taimi e telefoni mai ai isi foi VIP e fia malaga mai i mataupu tāua i Samoa ae fia maua vave sa‘u faamaoniga tusitusia e faigofie ai ona maua visa e malaga mai ai ma afea Ausetalia poo Niu Sila e vaalele e malaga mai ai ona o le faafaigata foi o ia atunuu ona pasia a latou visa.
