Ua masani le toatele i si tamaitai o Lenati Perosi, i si ana auaunaga i le atunuu, e saofai mai lava i le taeao i si tamai fale‘ie ma faasoasoa atu apainu ma Bongo i tamaiti e toa 6, ma faapea ona taufetuli solo nei tamaiti e faatau ma toe foi ane.
O le taeao o le Aso Gafua na asia ai e le Savali lenei tina, peitai e lei maua se avanoa e faatalatalanoa ai, ona sa toesea mo le asia o lana taavale o loo faalelei nisi vaega ua faaletonu.
O lea na maua ai le avanoa e faatalatalanoa ai lona uso sa vaaia le pisinisi i lea taeao. na mafai ai ona faamaonia i se talatalanoaga a le Savali ma le uso o Leinati, e moni ua mae‘a ona faatau le taavale la‘u pasese a Leinati i tupe sa mafai lava ona maua i si ana pisinisi ma faaputuputu.
Sa fesiligia i le aofai o le tupe mamā e maua i le aso, ma faailoa mai e tusa ma le $150.00 e masani ona ia vaaia i le tele o aso o le vaiaso e toalua ai ma lona uso i le taumafaiga o si ana pisinisi.
O le faaiuga o vaiaso taitasi, e latalata lava i le afe tala le tupe e mafai ona ia faitauina o loo uu i le lima o lona uso o Leinati.
Na amata mai lenei pisinisi, sa na o le tina talavou lava ia Leilani sa nofonofo i le tele o vaega o le Maketi i Savalalo, ma taumafai e faatau atu nai apainu faapea ma Bongo, peitai ua avea le toatele o alo ma fanau o le atunuu ua fiafia e faatau savali ia oloa, na tupu a‘e ai se manatu ia te ia, e pei o le auala sili lea ona lelei e vave maua ai nai seleni faaopoopo, o le onosai e totogi nai tamaiti ma sa lei toe faatali sa ia saili ane nisi o tamaiti e masani ona vaai i ai, ma faato‘ai i ai lona manao, ma faapea loa ona amata i tamaiti e toalua, faasolo ane i le toatolu seia oo lava ina ua toaono ma ua feololo foi si seleni e maua i le aso.
O aso pisi e pei o aso o le Kirisimasi ma aso o Tina ma aso o Tamā poo le Teuila foi ma le Sisigafu‘a, o aso sili ia ona lelei ai tupe maua o lenei pisinisi.
E lē o se galuega e faigata, na o le saofai e tapa le tupe ma toe tuu atu isi apainu ma pepa Bongo, a ua mautinoa o se lumanai manuia e maua ai pe a lelei ona faaaogā le seleni e maua ai. E tele naua avanoia e maua ai seleni a o tatou tagata, ae o le faafitauli o loo aliali mai, o le lē faaaogā tatau o le aso.
E anoanoai fanau ua faamutaina aoga e lē o faigaluega, na o le moe faasopola i le aso atoa, e mānava galuega i le afiafi o faapi olua lava e aunoa se feau tatau e alu i ai.
O le tupulaga lea 16 ma le 17-18 tausaga, ua aliali mai o latou ia o loo avea nei ma sasa i mātua, e iai la le toatele o faatau savali nei apainu ma Bongo ma isi lava oloa i le Taulaga, e ese mai i le vasega toaono a Leinati, e momo‘e lava le tagata ia e tuli lana komisi, e laasia le ta‘i $50, e ausia foi e nisi le $80, e alu ma ave i le fale i le aso, ma ua tua i ai nai mātua o loo faamuli mai i le aiga.
