I se feiloaiga i le aso ananafi ma lē o loo faauluulu i ai tapenaga faatasi ai ma le tuufaatasia o ni Au a tamaitai mo le taamilosaga “Pacific Aotearoa Cup” le susuga ia Nick Bakulich, na ia ta‘ua ai e faapea, o loo lelei ma atoatoa sailiiliga uma faapea foi tapenaga mo le tuufaatasia o ‘au uma a tamaitai mai lava i le U15, U19, ma le Open Grade.
Ma o se tausaga siitia lenei i le tau sailia lea o tamaitai Samoa mo le Au a Samoa lava ia i nei taamilosaga. Mai lava i taaloga o le Ipu o le lalolagi i le taaloga o le lakapi a tamaitai faatasi ai ma isi taamilosaga, o loo maua ai avanoa o tamaitai e taaalo ai.
Masalo o le tasi lea mafuaaga tele ua molimauina ai le agaigai mai o le toatele o tamaitai Samoa i nei avanoa, ona ua leai se taaloga ua tele ina faapolofesa le tele o taaloga ma manuia ai i seleni lelei.
O le toe vaiaso lenei o tapenaga mo le filifilia lea o Au mo le Pacific Aotearoa Cup e faia i Aukilani i Sisifo i le aso 14 ma le 15 o Fepuari i le tausaga nei 2015. O se tasi o vaega tāua mo le silafia i lenei taamilosaga a tamaitai o loo tapena mai e le Iuni Lakapi Faatamā a Niu Sila poo NZ Rugby Union Developing Women’s Rugby.
Ma o se avanoa foi lea e ono faamanuiaina ai nisi tamaitai i ni konekarate e taaalo ai i fafo pe ono filifilia ai i le au a Tamaitai a Niu Sila poo nisi foi Iuni ma kalapu Lakapi i Niu Sila ma faalautele ai le malamalama i lenei taaloga.
O loo iai nai fuafuaga i ni taaloga e faia e faafetaui lelei ma le faaaliga masani a le Pasefika i tu ma aganuu (Pasefika Festival) ina ia faataunuuina ai.
O loo loma se faatalanoaga i le vaiaso fou ma se tasi o alo o le atunuu o loo galue nei i totonu o le Iuni lakapi a Niu Sila le tamaitai ia Vaniah Seve Lavea Wolfgram i le tāua o taamilosaga mo tamaitai aemaise ai le taamilosaga taisefululima e tamaitai, ma faapea foi ona manuia ai le itupa o alii i faamanuiaga tau seleni tetele i nei taaloga.
O le po anapo ma le afiafi ananei lea o loo tatala ai pea le avanoa mo nisi o tamaitai o loo fia auai ai i le Au a Aukilani Samoa U15, U19 ma le Open Grade. E lelei ona faafesootai vave loa Nick Bakulich i le Telefoni 376 0799.
