O le tuufaatasiga poo le Reunion a le aiga o Tuilaepa i Sapapalii sa faataunuuina ia Aukuso le masina na tea nei i Magele, o se fuafuaga faagasolo a le aiga i tausaga taitasi.
Peitai o le tauaofiaga sa faia i lenei tausaga, ua atoa i ai le 101 tausaga talu ona amata faavae le lotu a le aiga.
O lagona o le fiafia ma le olioli sa faaalia i lea tuufaatasiga, a o le isi foi itu, sa lagona foi le faanoanoa, ona sa manatua ai pea le toatele o tuaa sinasina o le aiga, sa latou totōina lea fatu tāua, peitai ua amia e le Matai i le Lagi.
O le Lotu sa amata mai lava i totonu o le aiga ma le afioaga i Samoa, a o toaititi le lio faalotoifale o le aiga.
E oo mai i le taimi nei ua atoa i ai le 101 tausaga, a ua faamaonia ma se fuainumera tele ma le faatupulaia o le faitau aofai o tagata na tutupu ma soifua a‘e i tuaa ma mātua sa amataina mai lea faamoemoe.
E masani ai ona faataunuuina le lotu i le vaiaso tonu o le Talalelei, ona o se taimi tāua tele lea i talafaasolopito o le taunuu ai o le Talalelei i Samoa, ma o se faamanatu tāua foi lea mo le aiga e manatua ai pea le taeao fou e lē gata mo le afioaga a o le atunuu atoa i Samoa.
E tasi le aso sa faataunuuina ai le mafutaga o lenei tausaga, ma sa faia lea i le maota o le afioga ia Tuilaepa Elise i Massey Road i Magele. Sa faamamafa ma autū le faamoemoe o lenei tausaga agai i le talosiaina ma talosaga e momoli ai fanau a le aiga i luma o le Atua, ina ia faamanuia atili talu ai ua tupu ma ola le aiga.
Na faamaonia mai e le sui o le aiga, le susuga ia Tuilaepa Faiai Reupena Kovati e faapea e fa tino faavae o le aiga, o Faiai, Mafuli, Mekala, ma Elise.
O le tupuaga mai ia Mafuli o se tasi lea o vaega sa faamaonia mai le tulaga o le toatele ma le vave lona faatoateleina.
O se tasi lea fiafiaga o le aiga atoa talu ai o nisi ia fua aliali mai o le alofa o le Atua i itutino o le aiga, atoa ai ma le faamealofaina e ala i lana foai i fanau o loo faaopoopoina ai pea le faitau aofai o le aiga.
O loo tatalo le aiga ina ia mafai ona toe aulia atu ma le fiafia ma le manuia le isi aso ma le taimi ua atofaina mo le tausaga fou e toe maua ai se isi feiloaiga tuufaatasi a le aiga mo le faamoemoe lava e tasi e pei ona sa totō ma luluina mai i le amataga e tupuaga ma tuaa faavae.
