E toaiva tagata i lo tatou atunuu ua aafia i auga o le fulu o meaituaolo le H1N1 poo le swine flu, ma ua mautinoa atili ai le toe afea o Samoa e lea ituaiga o flu ma ua saga faamalosia ai nei lapataiga o puipuiga faalesoifua maloloina.
O le faagasolo ai o polokalame o le Teuila i le vaiaso ua mavae atu nei e lei iai ni fautuaga faalesoifua maloloina ina ia tau mamao ese le atunuu ma ia nofoaga tumutumu ona e mafai ona puipuia le soifua peafai e usitaia fautuaga.
Faaalia e le fomai sinia o le vaega o togafitiga le afioga Lemalu Dr Limpo Fiu, e tumau lava fautuaga masani o le nofo lelei i le fale pe afai o loo fulu, ma ia lava le mālōlō ma inu fualaau o tino gagase. Ua ave foi le fautuaga a le Matagaluega o le Soifua Maloloina i falemai faaitumalo uma i le atunuu ina ia tuuina atu fualaau o le Tamiflu i tagata ua iai le talitonuga ua aafia i le swine flu. O le toaiva o i latou ua maua i le gasegase o loo aafia ai ma le tina maitaga na muamua faamaonia ua maua i auga o lea ituaiga o fulu.
Sa lipotia i le tatou lomiga talu ai le toe tapena o le Matagaluega o le Soifua Maloloina i auala uma o puipuiga mo le faama‘i o le swine flu ona e lē o toe natia le toatele o tagata Samoa i Niu Sila o loo malaga i le atunuu mo fuafuaga eseese.
Ua ese lagona o le atunuu i le toe afea o Samoa i le faama‘i, ona ua logosaia fautuaga o loo faamalosia e le soifua maloloina. E ui lava foi e faapea e faaeteete gata le ulufale i Samoa o nisi o le atunuu o alaala i Niu Sila lea ua toe sosolo ai le swine flu, ae e lē mafai ona taofia le feoai o tagata.
E lē o faailoaina mai e le matagaluega poo ai tonu i latou ua aafia i le gasegase ae poo taofia foi nisi i le nofoaga faapitoa mo gasegase ua tatau ona ave i ai le faamuamua. Sa faapea foi le tulaga sa iai ina ua malosi le pepesi muamua o le swine flu.
O le fautuaga a le Matagaluega o le Soifua Maloloina, e leai se mea o le a faapopole vale ai fua le atunuu i le toe afea o Samoa e lea faamai, ona ua iai fualaau o le Tamiflu i falemai faaitumalo uma faapea falemai autū mo le tuuina atu i tagata ua aafia.
O loo mataalia le vaega o le soifua maloloina i Amerika Samoa i le vaavaaia lelei o tagata malaga atu mai Samoa Tutoatasi, ina ia siakiina lelei pe lē o o atu ma avatu siama o le swine flu. O le tulaga foi lea o loo mata‘itū e le soifua maloloina i Samoa.
