E matautia le matagofie ma le mamā aemaise o le telē, faatasi ai ma le aulelei o alii ma tamaitai faigaluega i le fale ‘otiulu fou ua tatalaina nei i totonu o le taulaga faatau i Magele.
O lea nofoaga ua mae‘a ona saunia lelei ma tapenaina lelei mo le faafugaina o lauao, teuteuina i soo se manaoga e manao i ai, atoa ai ma le teuteuina ma le faamatagofieina o foliga.
O se vaaiga na maofa ai le toatele sa molimauina le tatalaina mo le taimi muamua i le taeao o le Aso Tofi o le vaiaso talu ai, ona o le telē ma le matagofie o totonu o le fale.
E silia ma le sefulu tagata e mafai ona faaaogāina le auaunaga mo le taimi e tasi. Ae sili ai ona toatele le aufaigaluega e faafeiloaia manaoga, ma faatalanoaina le mamalu o tagata e agai atu i ai.
O alo o Samoa e ana lea tautua, ma o le tasi foi lea o mafuaaga na faateia ai le toatele ona e lei iai se isi nofoaga telē faapea ua pulea ma faatautaia e se tagata Samoa.
E iai lava nofoaga ma pisinisi i lea foi ituaiga taleni, peitai e toalua i le toatolu poo le toafā foi, peitai o le nofoaga i Magele e telē, ma e latalata i le to‘a 20 tagata faigaluega.
O le toatele lava foi o le aufaigaluega o alo lava ma fanau a Samoa. Atonu ua tala fetaui lava foi lea nofoaga ma le toatele o le mamalu o le atunuu e agai ane e faaaogāina le auaunaga.
E leai ni taimi faatulagaina e tau faia, ae o le tagata lava e muamua i totonu e muamua foi ona faatino i ai le tautua. Peitai afai foi ae faatali, masalo e lē silia ma le 5 minute e faatali ai, auā e toatele naua le au galulue.
O le tamaitai ia Lynette ma Dennis Tualaulelei o faatonu ia o le kamupani ma auaunaga e tele.
O le a mafai ona molimauina lea nofoaga manaia tele pe afai e te asiasi i ai e faafuga ma teu ai lou lauao, ma feiloai i ai i le aufaigaluega laufofoga fiafia ma le tausafia.
E faamalo atu ai foi le tatou nusipepa i le agaga saili malo ma le taumafai i galuega lelei ma atinae aogā a nei alo o le atunuu.
