“Na teuteu e lē sa avea ma minisita o le pulega o tineimu le faaseā a se tamaitai faigaluega sa ia tuua‘ia le alii pule i se faigaaiga fai faamalosi”
O le taunuuga o suesuega a le Komesina o Sulufaiga i mataupu sa tuua‘ia ai e le aufaigaluega a le Pulega o le Tineimu lē sa avea ma faauluuluga le susuga Seve Tony Hill lea ua faamuta i se faaiuga a le Kapeneta lona toe avea ma Komesina o lea matagaluega a le Malo, ua taulimaina ai e le tusitala se kopi o le lipoti a le Komesina o sulufaiga faatatau i lea suesuega.
Ua faaalia ai o le afioga i le Palemia na ia tuuina atu le mataupu i le ofisa o le komesina o sulufaiga mo se sailiiliga ma faapea ona tuuina atu ai se lipoti i le kapeneta ma faia ai loa le faaiuga. Ua faailoa i le lipoti tuua‘iga a nisi o le aufaigaluega e faasino i ni amioga ma pulega soonafai a le afioga Seve, na ia faaoolima ai i nisi o le aufaigaluega.
O le a lē faailoaina suafa o i latou na faia i ai ia tulaga e le afioga Seve Tony Hill, a o avea ma Komesina o le tineimu, ona o le puipuia o o latou tulaga aemaise o nisi aafiaga mai o latou tiute faatino, e ui o nisi o alii ofisa na aafia ai ua faapea ona lē toe galulue i le taimi nei.
Faaalia i le suesuega na faia o nisi na faaoolima i ai lē sa avea ma faauluuluga sa lē mautonu i ia uiga o le alii pule. O atugaluga foi o le aufaigaluega o uiga faaalia ma upu soona lafo lea na faamatala se isi tagata faigaluega i lana molimau i le Komesina o sulufaiga, a oo ina lē fiafia le alii pule ona faatusa lea o latou i lona tulai‘u (muli) se‘i tulou.
O upu masoā na te lafo ma nisi lava o uiga lē manuia e faaali atu aemaise e sili ona ogaoga i le vaai ma le faalogo a le aufaigaluega pe a faalumaluma latou e le alii pule i le mea e tumutumu ai tagata, pe afai o loo faatino ni o latou tiute.
O se alii Ausetalia o loo galue o se faufautua na ia molimau ma faailoa lona valaau leotele atu i le alii pule i nisi o taimi e faia ai galuega poo ni faataitaiga, ona na te molimauina le lē talafeagai o se gaioiga sa ia faia poo nisi taimi ua oso faalava Seve e faatonu le galuega, ae o lea alii faufautua o loo iai le vaaiga o le galuega.
Tuua‘iga o faiga matagā i ni tamaitai faigaluega
O se tasi lea o vaega o le faaseā na suesueina e le Komesina o sulufaiga. Ua faailoa i le lipoti o se tamaitai o loo faigaluega i le taimi nei, na faamalosi e le alii pule poo le Komesina ua faamalolo.
Na molimau nisi o alii ofisa, o le aso na tupu ai lea gaioiga na la vaaia ai le alii pule ua nonofo faatasi atu i tua o le taavale a le ofisa, ae e lē o se mea e masani ona tupu.
O le aso lea na faamatala le tamaitai i le suesuega na faamalosi ai o ia. Na ave lana tagi i leoleo ma oo ai le mataupu i le faamasinoga, peitai na valaauina e lē sa avea ma minisita o leoleo ma le tineimu i lea taimi mātua o le tamaitai ma faia ai se teuteuga o le mataupu i le va ma le Komesina o le tineimu. Sa teena e Seve le tuua‘iga a le tamaitai i luma o le Komiti faafoe poo le Board ina ua oo i ai le mataupu.
Peitai ua faaalia i le lipoti a le Komesina o sulufaiga ina ua mae‘a ona teuteu le mataupu e le minisita, na fono ai loa le aufaigaluega ma le alii pule ma ia faatoese ai i le tamaitai i le mea na tupu. O se faailoga lea e pei ona faaalia i le lipoti ua tautino lava le alii pule i le moni o le gaioiga na ia faia.
O le tagi a lea tamaitai na toe faaui i tua e le Komesina o leoleo mai le faamasinoga. O se isi foi tamaitai o le aufaigaluega na ia tuua‘ia le alii pule i le faia o ni uiga matagā ia te ia. O lea mataupu ua i luma nei o le faamasinoga ma o loo faatali le isi valaauga o le moliaga o le faaoolima matagā ua molia ai Seve Tony Hill.
