E lei mulimuli le Board i taiala e filifili ai le Faiaoga o le Taitoafitu

O se faatalanoaga a le polokalame a Savea & Tui i luga o le Radio Samoa i le Aso Toonai talu ai faatasi ma le alii tusitala ma faasalalau o taaloga a le leitio 89.1 mai Samoa, le susuga Sioeli Alofaifo, na mālie ai pe faateia ai foi le faafofoga a le atunuu, i nisi o faaletonu na faailoa e le susuga Sioeli, e tusa ai o le mataupu o loo lagalagā ai pea lagona o nisi o le atunuu i lenei taimi, e tusa ai ma le filifiliga o le faiaoga fou o le Manu Samoa 7, le susuga Viliamu Punivalu.
Saunoa Sioeli, e oo lava ia te ia e na te lei faatalitalia le ono tulai mai o le susuga Punivalu i lenei taimi mo lea tofiga tāua o le ‘au a le atunuu, ma o le faateia foi lena o le toatele o le atunuu.
Fai mai a ia, sa faia foi i Samoa tulaga o faiga palota i luga o leitio e fesiligia ai finagalo o le atunuu i se tasi e tatau ona pale mai le tofiga o le faiaoga o le Manu Samoa. Ma o le toatele lava sa mātele e palota i le afioga ia Muliagatele Brian Lima.
Sa fesiligia foi ni manatu o nisi sa avea ma sui tuai o le Manu Samoa e le polokalame a le susuga Sioeli i le TV, e pei o le afioga ia Misa Lolagi Koko ma Seiuli Paul Wallwork, ma na ta‘ua ai, o Muliaga lava e tatau mo le tofiga o le faiaoga o le Taitoafitu.
Ta‘ua e Sioeli, atonu o le faateia o le toatele o le atunuu i le faaiuga a le Komiti Faafoe a le Iuni Lakapi, ona e lei tele tele ni talaaga o le susuga ia Punivalu i le lakapi. Na tautino foi le alii faasalalau, e lē faapea e iai se mea e lē fiafia ai ia Punivalu, ma o ia foi o se uo i le alii faiaoga fou.
Ae ona o le itu e sili ona lē fetaui, pe a toe foi a i tua i le taimi na aumai ai le faasalalauga o le avanoa mo le sailiga o se Faiaoga, o le requirement muamua lava sa muamua mai le faasalalauga a le Iuni lakapi fai mai, o se tagata, o le minimum, ua pasi ma ua complete lana Level Three Coach a le IRB.
Saunoa la Sioeli, i le Pasefika atoa e aofia ai Tonga, Fiti ma Samoa, e na o le toalua lava coaches ua pasi po ua complete, ua maua o la certificate o le Level Three i le Coach o le IRB, na o Muliaga Brian Lima ma Stephen Betham. O isi faiaoga (local coaches) e pei o le susuga Viliamu, o la e sue lana Level Three ae lei complete ona e lē tasi se tausaga e sue ai.
O le ala lea o le lē fiafia o le susuga Sioeli e tusa ai o le faaiuga, ona e foliga mai, e lei mulimulitui le Komiti Faafoe ia latou tuutuuga e tusa ai ma requirements o le sailia o se faiaoga. E oo foi i le requirement lona lua, o se tagata sa lelei ni ona past records, sa coach i le au taitoafitu ma lelei ni ona fitu.
A fua la iai mo se tagata sa lelei ni ona records mai tausaga e tele ua tuanai i le taitoafitu, o Tausa Faamaoni Lalomilo, o Galumalemana Rudolf Moors, ma Fata Milovale Moke. E moni sa iai records lelei o Viliamu mai lona coach ia Vaiala, ae lē faapea se tele se taimi.
Na toe faamautinoa e Sioeli, e tele ina tatou tusitusi lima i faiaoga ma tama taaalo, ae o le mea moni lava, o tagata ia e sili ona faaletonu ai le mataupu, o le Komiti Faafoe. Fai mai Sioeli, o le taimi nei ua matuā fai vaega lava le Komiti Faafoe poo le Board a le Iuni lakapi.
Ma o lona manatu, e toatele sui o le Komiti Faafoe ua tatau ona oese mai le tofiga o iai. Na faamamafa i le saunoaga a Sioeli, afai ua lē qualify Muliaga i le tofiga, sa tatau la ona toe foi le Iuni Lakapi i le process sa faatulaga mai le faiga o le faasologa o faiaoga, ma e tele lava nisi aiaiga e aliali mai ai le lei amiotonu o lenei faagasologa.
Sa faailoa foi e le alii faasalalau le taimi na alu ai Punivalu e ave le Under 20 i le Ipu a le lalolagi i Falani. Na alu ai ma se tamaloa palagi mai le kalapu a Hawks Bay o se development manager a le Hawks Bay Rugby Union NZ, na alu o se faufautua o le U-20 pe alu e analyse le Under 20 i ana taaloga.
Ina ua uma taaloga a Samoa ia na faiaina ai, na imeli mai le tamaloa lea ia Matthew Vaea, le pule o le HPU, pe mafai ona tago ia e fai game plan o taaloga ia e totoe a Samoa. O le tala sa aumai ai totonu o le imeli a le tamaloa, “I’m so disappointed about Samoa Under 20’s head coach…inexperienced.” O le uiga o le faamatalaga a Sioeli, sa tatau ia Tuala Board, ona ave le imeli lea i le panel poo le Board i le taimi na fai ai le faaiuga mo se faiaoga, auā na muamua maua e ia le imeli ae lei faia le filifiliga.
Na faauilavea Savea ma fesiligia se finagalo o Sioeli, poo le ā sona manatu i le mataupu o loo tele ina gugulu ai tagata, e tusa ai ma le seei pea o le Afioga i le Alii Palemia i le tofiga o le Taitaifono o le Iuni Lakapi, pe ua lē alagatatau ona faaseetuagalu le afioga i le Palemia mai lea tofiga ae tuu le avanoa i se isi tagata.
Peitai e mālie le tali mai a le alii tusitala i lea fesili. Saunoa Sioeli, “O la‘u tala ma le sa‘o ia oulua, o la‘u mene i le Alii, e alu ese loa le afioga i le Alii Palemia mai le Iuni lakapi. O le tele o mea o loo tutupu i totonu o le Iuni lakapi, e lē o silafia e le toeaina. O le mea foi lea ua tupu i le tele o players ma coaches, ua latou lē o toe talitonuina nisi o vaega o le Board.”
Ta‘ua e Sioeli, o le tele o nisi taimi, e toe sefe e le alii Palemia isi players ma coaches ona o mea piopio a isi tagata la e i totonu o le Board. E faatoa toe iloa mulimuli ifo e le Palemia nisi faaiuga sese ua faia e le board faatoa toe faasa‘o e le Palemia. “E alu ese loa le Palemia ma le Board a le Iuni Lakapi, tatou vaai lea i le palalū o le tatou amio,” saunoa ai Sioeli.
O le molimau a Sioeli, o le mea ua tupu i le taimi lenei i le Iuni lakapi a Samoa, ua faivaega le Komiti Faafoe, ma ua foliga mai e unai lava e sui lava o latou tama mai a latou Iuni faaitumalo, e pei o le Iuni a Apia, ese mai le vaega i le Iuni a Apia West.
Fai mai Sioeli, o le homeword muamua lava a le alii faiaoga ua iai nei, o le tapenaga a le ‘au taitoafitu i le Pacific Mini Games lea e fai i Wallis ma Fotuna i le aso 2 – 12 o Setema, e alu e puipui le pine auro e pei ona iai nei.
O le itu mālie na toe faailoa e Sioeli, na faalogo i le fonotaga a le Board lea sa aami ai le susuga Viliamu, o la ua tuu ai ma le lauvai mai le Taitai o le atunuu, “E 4 legs muamua a le IRB, ia siamupini. A misi, fafo ma le maafala.”
O toe upu faufautua a le susuga Sioeli, e talosagaina le mamalu o le atunuu, ia omai e lagolago ma opogi si alii faiaoga fou ua iai nei. Auā o lana ia faaseā, e leai se mea e aafia ai fua le susuga ia Viliamu, ae o le auala lē amiotonu sa faagasolo ai le faiga filifiliga a le Komiti Faatonu.
Aua ne‘i misia le polokalame matagofie ua amataina nei i le Radio Samoa, i aoauli uma o Aso Toonai taitasi mai le 12:30pm – 5:00pm, ua tapena ai Savea ma Tui, e lalaga mai le tele o mataupu atonu o loo fia silafia e le mamalu o le atunuu, ae o le a matuā vailiili lelei i talanoaga a nei alii, ma avatu ai se malamalamaga tonu ia Samoa o loo faafogafoga.