Falelauasi le Crusaders, ae pe toe suipi le Chiefs i le la Final ma Brumbies?

E ui lava ina malolo le Crusaders i le la semi final ma le Chiefs, ma ua faamuta ai lona avanoa e saili siamupini ai i le Super 15 Rugby mo lenei tausaga, ae lei ō gūgū ai le autapuai a le Crusaders. E finau mai pea, na o le tasi lava le ‘ai o loo va ai, 20 i le 19. Ona sa‘o ai lea o le isi toeaina, ‘o le ulupoo a o le ulupoo, o le manumalo lava o le manumalo’.
Ua lata i le ono masina o vevesi le taamilosaga a le Super 15 Rugby, i le sailia o se siamupini o le 2013. Sefuluono aulakapi tuufaatasi, mai Ausetalia, Aferika i Saute ma Niu Sila na iai i le taamilosaga. Ae o lea ua totoe mai le Brumbies ma le ‘au a le Chiefs faamoemoe e saili siamupini i le faaiuga o le vaiaso nei.
O le taaloga o le semi final muamua o le taamilosaga i le va o le ‘au a Crusaders ma le Chiefs, na vaelua ai le autapuai ona o ‘au uma a Niu Sila. Peitai na manatu le toatele o se taaloga faigata, auā o le Sifi o le siamupini lea o le Super 15 i le tausaga na tea nei, a o le Crusaders ua faafitu na manumalo i le taamilosaga lenei, talu mai le 1998 seia oo mai i le 2008 i le final ma Waratahs ma manumalo ai, lea lava la e lei toe tofo Canterbury i le suamalie o le manumalo, o le ala faigata foi lea o le malolo faafia ma lē sao i le Final.
E lē taumate le mataina o le taalo a le alo o Samoa, Lelia Masaga i le taimi na sikoa ai, e pei o se lele a se vaatau le saoasaoa o le tama, ma o le tulaga lelei foi lea mo le ‘au a le Chiefs i le faasauni atu ai mo le sailiga siamupini ma le Brumbies i le faaiuga o le vaiaso nei.
O le fā minute mulimuli na totoe o le taaloga, sa manatu nisi i fefaasoaa‘iga i luga o le ea ma talatalanoaga, atonu ana iai se fuafuaga a le Crusaders e faaaogā nai minute na e unai ai se sikalamu agai i le laina sikoa, atonu lava e ono fiki se laki ma maua ai se ‘ai faaopoopo e manumalo ai. Ae ua pau lava, e toe oso foi le la.
Ua matuā faateia le Bulls i le faavavai faafuasei e le Brumbies i le semi final lona lua o le taamilosaga ma le faanoanoa tele, ona o ona lava lumafale lea ua vivini ai le moa folau ma toe foi mai ai ma le manumalo. E lei iai i se mafaufau o le Bulls i se tulaga faapea o le a tulai mai, i le toe lua minute mulimuli o le taaloga, ae toe faatepa loa e le Brumbies, Aferika e pei o upu a le pese, ‘tu tu a nimo’.
Sa matuā fili i le mafaufau, pe faafefea ona toe sao atu le uigi saoasaoa a Brumbies, o Tevita Kuridrani ma tatao lena sikoa, kiki i le pou, ova foi le aa a Lealiifano, ua atili gigiva ai Aferika, ma maua ai ‘ai faaopoopo, ma manumalo ai Brumbies i ‘ai e 26 ae 23 ‘ai mo Bulls. O loo tuua‘ia lava e le Bulls i latou i le faatamala tele, i le tele o avanoa maumau, sa tatau ai ona kiki le polo o sala, e tuli ni ‘ai faaopoopo, peitai latou te lei faaaogāina, ae sa faamoemoe i le malosi ma le manatu maualuga e mafai ona faatamoe le polo ina ia maua se sikoa mo se ‘ai faaopoopo, ae o avanoa maumau e leai ma se manuia o na taumafaiga. O le fesili tele la lea o le a tulimatai i le tapuaiga a le atunuu i lenei vaiaso, faamata e toe suipi le Sifi (Chiefs) ma puipui lo latou manumalo o le tausaga ua tuanai? Pau le tulaga mautinoa, o le a tasi le tapuaiga a le atunuu i le Chiefs.
O le ‘au a le Brumbies e pei ona silafia o le ‘au a Ausetalia e faamautu i Canberra, ma ua fai si leva e lei toe ofi i se sailiga siamupini talu mai le tausaga 2004 a o Super 12, lea na Final ai ma le Crusaders ma manumalo i le taamilosaga lea. E na o le faalua na manumalo, o se ‘au finau, pe a faatusa atu i le Super 15 Rugby o le tausaga ua mavae, sa tulaga 7 ai. Peitai lea ua toe maua lona avanoa e finauina ai le manumalo.
O le ‘au a le Chiefs na manumalo i le tausaga na tea nei, na pau ai lea o le manumalo i talafaasolopito o le Super Rugby peitai, lea la ua toe sao i le Final, faamata o le a toe tatao le manumalo pe leai? O le sailiga siamupini o le faaiuga o le vaiaso nei, o le a faia lea i le malaetaalo Waikato Stadium i Hamiltone, i le 7.35pm taimi Niu Sila, ia manuia lau tapuaiga.