Atoa le 5 tausaga o le tamaitai o Fuarosa Esekielu

O se fiafiaga o loto o mātua le susuga i le faafeagaiga ia Pastor Sasa ma le Faletua ia Fuarosa Esekielu ina ua aulia mai e si a la alo tamaitai, Fuarosa Esekielu le atoaga o lona lima tausaga, e pei ona sa faamanatu faapitoa i le Aso Toonai o le faaiuga o le vaiaso. Sa tumutumu ai le mamalu o le ekalesia, o aiga, faapea uo a le tamaitai fai aso fanau, faia lea i le Hall a le aoga Sir Edmund Hillary Collegiate i Otara.
‘O aso faapenei, e avatu uma ai faamanuiaga, tatou te faailoa ai i le Atua le tatou loto faafetai ona ua aulia e Fuarosa nei tausaga e lima,’ o se vaega o le lauga faamanuia a le susuga i le faafeagaiga ia Poni Fonoti sa taitaia le sauniga.
E ese foi le vaaiga i lea aso, o se tamaitai pito i laititi, a o tapenaga ma le alofa faatino o mātua ma aiga e maeu le matagofie.
Ona pei na saunoa si ona tamā, le susuga Sasa Esekielu, na pau lava lea o si ona afafine, mai le fanau tama e toatolu matutua, o ia o se faamanuiaga mo i latou mātua faapea le fanau uma. Na faamae‘a le aso fanau o le tamaitai o Fuarosa, i se aiga tele, faapea faafiafiaga a le autalavou, o ausiva eseese sa auai ai.
Momoli atu ai ma faamanuiaga mo le atoaga o le 5 tausaga o Fuarosa Esekielu ma ia manuia tele le amataga o le aoga o le a feagai ai. Happy 5th birthday Fuarosa!