“E le tatau i le alii Palemia ona taumamafa faatasi ma le Fofoga Fetalai i taimi o malologa masani a le fono aoao a o usuia le Palemene”
O le mau a le afioga Aeau Peniamina le faipule o Falealupo sa avea ma fofoga fetalai i se tasi o paeaiga a le Palemene ua mavae a o avea Tofilau Eti Alesana ma Palemia, ua lē toe tutusa aso nei ma aso ua mavae a o seei i le tofiga fofoga o le fono. O lona finagalo e lagolago ai le finagalo o le taitai o le Itu agai ina ua fesiligia e le tusitala o lenei lipoti, taualumaga a le Palemene e lei mamao tele atu ma le tauaofiaga i nai vaiaso e lei mamao tele atu sa lapataia ai pea e le Fofoga Fetalai i lona soli fono.
O le finagalo o Palusalue e le o tutusa avanoa o loo maua e le Itu agai ona a oo ina faauilavea le Palemia poo se minisita, e fao uma ai lo latou taimi a o taumafai e momoli so latou lagona i se mataupu e talanoaina. O le finagalo o Aeau o lea ua soli e le Palemia le va nonofo ai ma le Fofoga Fetalai pe a usuia fonotaga a le fono aoao faitulafono, o le ulufale i le ofisa o le Fofoga o le fono pe a fai le malologa masani. O lana mau o le vaisua lea e saofia ai ni milomiloga faapolokiki e mafai ona tuuaia ai le lē tutoatasi o faaiuga a le Fofoga Fetalai o ia o le pule o le Palemene.
Na saunoa foi le faipule o Falealupo o ia le fofoga fetalai muamua na faatagaina se palemia e ulufale i le potu e faapitoa i le fofoga fetalai. Le potu lea o loo i tua ane o le maota fono e pipii lava i le maota ma e faaaogā pe a fai le malologa masani e tali ai le sua a le nofoa.
O le afioga Tofilau Eti na ia faataga e ulufale i le potu e taumafa ai, ina ua faaletonu le aao (vae) o le Palemia i lena vaitaimi ua lē mafai ona agai i le vaega sa masani ona tali ai le iputi o le taeao i le malologa sefululima minute ona faaauau lea o le fono. Mai le taimi lea e oo mai i le asō ua faaauau pea e le Palemia o iai nei. “O le mea lena ou te tau matamuli ai e talanoa i le vala lea, ona o a‘u na amatamea ae na mafua ona ou faataga le Palemia i le potu o le Fofoga Fetalai ona o lo‘u ava i ai ua faaletonu lona aao”.
O faiga faapalemene a Malo o le Taupulega e pei ona saunoa lava le faipule o Falealupo e lē mafai ona ulufale se Palemia i le potu o le Fofoga o le fono a o usu le fono, ona o le puipuia malu o le tutoatasi o faaiuga ma ia leai se faaitu‘au.
“Ua lē o le mea lea o loo fai nei, ma e tatau ona taofia loa”, saunoa ai Aeau.. O le afioga Afamasaga Vaili na sosoo ile tofi fofoga fetalai ina ua mae‘a Aeau, ma na faaalia e le faipule o Falealupo, sa tumau lava i lea vaitau le tutoatasi o le nofoa ona sa lē auai ini fono faavaega faaupufai.
Peitai o le taimi o le afioga Toleafoa Afisi na faaalia e Aeau na amata ai ona molimauina suiga lea ua oo mai i le taimi nei e lē o iai se suiga. E lei mafai ona maua se avanoa e fesiligia ai se finagalo o le Palemia ma le Fofoga Fetalai faapea nisi o faipule ua ta‘ua suafa i le lipoti, ae o le a tuliloa pea so latou lagona e tusa o le finagalo o le faipule o Falealupo o le sui taitai foi lea o le Tautua Samoa poo le itu faaupufai o loo agaia nei le Malo.
