O le valaauina ma meaalofa uma e sasaa mai aao o le Atua, e mafai ona avea ma taleni ma auaunaga pe a tino mai le lelei atoatoa e ala i faigata ma luitau o toleniga (training) aemaise o le tele o taimi faaalu i le faaiilaina ma le polesiina (practise).
E tele lava ina faigata le amataga a o itiiti le soifua, peitai a tumau pea le finau ma le faamalosiau a mātua, soosootau‘au ma a la tatalo faatuatua, e iu lava ina sua vaieli sa matutu ma oo i le taumasuasua.
O le Unasa Brothers o alo o le susuga i le faafeagaiga taulagi ia Apouani Tapuala Unasa ma le faletua ia Olevia, o taitai o le AOG Church of Samoa i le Setete o Vitoria, ae o sui taitai o Ausetalia.
Na amata fofoa le valaauina o nai o la alo i le aufaipese (worship team) a le Ekalesia ma faasolo vaaia ai tofiga a le Atua ma lana faauuga i o latou olaga. E ui lava foi ina tafafao ma taulapalapa tama ae o le auuso, e faaaloalo le tasi i le isi, aemaise o le faaaloalo i o latou mātua ma le galuega a le Atua, e iloa lo latou valaauina ma la latou taleni, e lē faapaole lona faiga ona e ava ma mata‘u i viiga o le Atua, i le va nonofo foi ma le Ekalesia, e iloa la latou tu ma le savali aemaise o le tautala, o uiga ia e alofagia ai le taa uso e le gata i lo latou Falesa, ae faapea uma i Falesa o le Ekalesia aoao i Melepone ma Ausetalia.
Ua loa tausaga o faalauiloa la latou taleni e le gata i faamoemoe o le pulega ma le matagaluega, ae o valaaulia mai isi Ekalesia Samoa, papalagi ma isi atunuu e pei ona pisi ai i lenei foi vaitau, peitai o lea ua fou sauni atu mo la latou faafiafiaga faa-Koneseti i le afiafi o le Aso Toonai aso 19 o Iulai, i le City Life Church i le pitonuu o Whittlesea i le 5 i le afiafi. Talosia le alofaiva o le Au Uso ia avea o se ipu faauuina e inu mālie ai le atunuu.
