O le tuutuuga lea a le Asosi o Taulasea ua iai nei i le mae‘a ai o se latou fonotaga, na talanoaina ai le mataupu i nisi o sui sa tulai mai i le tofi ua lē toe auai i le nofoaga autū o le asosi, ae o loo faaaogā pea pepa faamaonia ma tusipasi a le Asosi o Taulasea mo a latou galuega i o latou aiga.
O le tausaga na tea nei na faamautu ai le Asosi a Taulasea o Samoa, ae o lea ua faatolu ona sui lana laulau e faafoe ana galuega faatino.
O lea la ua o ese foi le Peresetene ma le Sui Peresetene o le Laulauafono sa iai ae ua toe sui atoa, ma na tapa le mamalu o tusitala e faalauiloa i ai a latou suiga.
“O le tuutuuga lea ua iai, o le tasi o le tausaga ma faafou le tusipasi o le taulasea o loo resitala i lalo o le asosi,” o se saunoaga lea a Moli To‘ala, le Peresetene fou lea ua faamaonia a le Asosi o Taulasea.
Na ia ta‘ua foi, o fuafuaga lava ia ua leva ona talanoaina a o tulai mai Vaitogi Isaraelu Seumanutafa i le tofi peresetene o le a faaauau.
Talu ai ona o tusipasi ma pepa faamaonia, o meatotino ia a le asosi, na ta‘ua e Moli o loo i totonu o le latou faavae ma ua iai le fuafuaga e talanoa ai i la latou loia, le tamaitai ia Tima Leavai ina ia iai se fuafuaga mo lea tulaga.
Sa fesiligia foi le tamaitai peresetene i le tulaga o tusipasi ma pepa faamaonia auā o nisi ia o meatotino a faamanuiaina ai le tagata ua pule ai loa ia, ae peitai na ia faaalia, e iai aiaiga o loo i le faavae ma o le maliega foi lea e auai uma ai i le nofoaga mo le faatinoga o tiute faataulasea.
“O tusipasi ma pepa faamaonia, o meatotino ia a le Asosi ona o le popolega ina ne‘i tupu mai se faalavelave i gasegase ona tuua‘ia lea o le asosi ona o loo faaaogā e taulasea ia meatotino,” o se faamatalaga lea a Moli.
O le mataupu ua mafua ai ona toe laga le laisene i tausaga taitasi o tusipasi, e faasaga lea i lē sa avea ma sui peresetene o le asosi, le susuga ia Ieti Tapumanaia. Sa matauina e le asosi o loo faaaogā pea e lea alii tusipasi ma pepa faamaonia a le asosi, ae e lē o toe oo mai i le nofoaga lea o loo faamautu ai sui auai i tua ane o le ofisa o turisi.
O lē foi sa avea ma peresetene o le asosi, Vaitogi Isaraelu Seumanutafa lea ua faamavae i le tausaga nei i le toe taliu mai ai i le faaaliga o tu ma aganuu a atunuu sa faia i Solomona, ma ua see atu ai loa le tofi peresetene i le tina ia Moli.
E ui i suiga ua vaaia i lenei taimi puupuu, ae o loo faamautu mai lava e tamaitai uma nei na feiloai ma tusitala, e lē o iai se faafitauli o tulai mai i le Asosi ma o loo maopoopo lava e ui o lea na faavae le asosi o to‘a 52 ona sui, ae o lea ua totoe nei na o le 25 i latou ua faaauau mai ai le asosi i le taimi lenei ma ana galuega.
O le taimi nei, ua aofia i totonu o le faiganuu a le Matagaluega o tagata tafafao maimoa mai fafo le asosi o taulasea, ma o taimi avanoa e lē faatino ai ni a latou galuega o le a latou faatino ai le faiga o meataulima auā maimoaga a tagata tafafao maimoa mai i fafo i lea nofoaga.
Ua iai nei foi se fuafuaga mo se isi lala o le asosi i le motu tele i Salafai ma o lea fuafuaga ua faaavanoa mai ai foi e le Malo se nofoaga i Salelologa e faamautu i ai taulasea o Savaii e resitalaina mai i le asosi.
O i latou ua tulai mai i tofiga o le laulau a le asosi, e aofia ai Moli e avea ma peresetene, o le sui peretene ua tuu atu ia Ana Finau Tanuvasa, faatonu Amia Faamausili, sui faatonu Fao Tanuvasa, failautusi Saumalu Saufoi, sui failautusi Moevao Ulu, teutupe Aoto‘a Solomona Nofoa ma le sui teutupe o Kerupi Moananu.
