O le Aso Tofi o le vaiaso ua tuanai sa feagai ai le Ofisa o Aoga ma se tasi foi o fonotaga i Aukilani i Sisifo, e lē gata ina faailoa fuafuaga a le malo mo le lumanai, ae sa fesiligia ai foi finagalo o i latou sa auai, ina ia faaleleia atili ai fuafuaga faataatitia.
O nei lava fonotaga oloo manaomia ai le auai o susuga i faafeagaiga, poo taitai o ekalesia eseese ina ia faailoa i ai ia fuafuaga.
E avea ai lenei avanoa e faafetaia ai le susuga i le faafeagaiga ia Lama Milford, ona e utiuti se taimi sa logoina ai, ae sa ia auai ma faaalia foi sona finagalo. Sa matuā faagaeetia sui o le ofisa mai Ueligitone, ona o le tāua o le auai atu o le susuga i le faafeagaiga, aemaise le tāua o ona finagalo faaalia.
Ua faailoa mai e le malo faamoemoega ma sini autū o ana fuafuaga mo le lumanai mo le aoaoga o tamaiti Pasefika.
Oloo laualuga lava le faateleina o le aofai o tamaiti Pasefika e auai i aoga amata saunia lelei, ma ia siitia pea le tomai o le tamaitiiti i le literate (malamalama i le faitautusi ma le tusitusi) ma numera i laasaga uma o le taumafai.
E manaomia le toatele o tamaiti Pasefika e ausia le NCEA i le laasaga 2 i le 2016, ma faasolosolo atu ai le numera o pasi i le 100% i le tausaga e 2023.
O le isi vaega tāua tele o le auai lea i aoaoga e tapena ai mo tusipasi taualoa, ma o le a matuā faamamafaina le tāua o le malamalama o le tamaitiiti i lana gagana, tu ma aganuu, ma lona faasinomaga.
O le isi sini autū, o le faamalosia lea o polokalame mo talavou, ma ia silafia ma malamalama mātua, aiga ma tagata uma i le tulaga o le aoaoga o alo ma fanau, aemaise o a latou matafaioi mo le faaleleia atili.
O nei lava sini autū, o le faaleleia o avanoa mo alo ma fanau ina ia maua ni lumanai lelei. Peitai, e lē mafai ona ausia pe afai tatou te lē malamalama ia tatou matafaioi, ae pe faapefea foi ona tatou lagolago.
O le ala foi lea ua naunau ai le ofisa o aoga ina ia tatou auai i ana fonotaga oloo faagasolo nei, ina ia mautu lo outou silafia ma se iloa auā lava fanau mo a taeao.
Ua toe fuafuaina nei e faia se fonotaga tele i Aukilani i Sisifo i le aso 22 o Novema, e faalauiloa ai nei sini autū, ma faailoa ai ni fuafuaga faataatitia a le ofisa o aoga ina ia ausia ia sini autū poo faamoemoega.
O lenei lava vaitau o le soifuaga ua fesuisuiai le tau, ua tele ina to faatautau le matagi ma lutaluta ai le gataifale. Ua manaomia foi ni tautai matapalapala e folau i la e lua.
A faaletonu le la fala, ona sisi lea o le la afa. O tautai tonu ia ua manaomia latou te fagotaina le gataifale i lenei foi seneturi. Peitai, e le mafai ona maua, pe a tatou lē omai faatasi, tutu faatasi, ma galulue faatasi ma le ofisa o aoga.
Manuia tele le alofaiva o si o tatou atunuu mo tiute ma galuega o lenei vaiaso.
