E faia lenei tusitusiga o lea ou te faatalitali i le malaevaalele i Dubai o se taulaga i atunuu a Arapi. E ese le maoae o lenei malaevaalele. Faato‘ā ou oo mai foi lea i ai. E fogafalelua le vaalele na matou malaga mai ai mai Niu Sila.
E lē gata o le telē o le vaalele, ae e ese foi le tele o pasi na pikiina matou mai le vaalele ma momoli matou i le isi itu o le malaevaalele lava lea. Matou taunuu mai foi i le malaevaalele, e ese foi le maoae o le telē o lea malaevaalele.
E ui ou te lei oo i fafo atu o le malaevaalele a Dubai, ae o mea lava ua vaai i ai o‘u mata e mautinoa ai le tamaoaiga o lenei atunuu.
Ou te manatu o tupe ia mai suauu lea ua faamanuiaina ai lenei atunuu. Sa ou faapea, tafefe pe ana faapea e maua le suauu i Samoa. Pe mata o le ā se tulaga e oo i ai Samoa pe ana faapea o se atunuu e tele ni alaoa e pei o lenei atunuu.
O lea o loo faatalitali le matou vaalele e malaga ai e faataunuu matou asiaiga i Palemene a Denmark, Sweden, ma le Palemene aoao a Europa i Brussels poo le Eropean Parliament.
O malaga nei a le Komiti a le Palemene o loo feagai ma le Va a Niu Sila ma Atunuu i Fafo (Foreign Affairs select committee).
O ma‘ua ma le afioga ia Lilomaiava Phil Goff sui a le Leipa, ma sui e toalua a le Malo e aofia ai le alii o loo avea ma Minisita lagolago a le Malo i mataupu tau i va i fafo.
E tolu sini autū o le matou malaga. Muamua ia faamautu ma faaauau le faamasaniga o sui o le Palemene a Niu Sila ma sui o Palemene i atunuu i Europa. O le tāua o lea faamoemoe ina ia faafaigofie ai le galulue faatasi o tatou atunuu, ma ia faafaigofie ai foi soalaupuleina o mataupu i taimi o feutagaiga.
O le mafuaaga lona lua, ia faaauau feutagaiga a le Palemene a Niu Sila ma le Palemene aoao a Europa e faatatau i le faamautuina o se feagaiga aloaia mo le faatau atu o oloa ma auaunaga mai Niu Sila i atunuu i Europa.
O loo iai se faamoemoe ia faamautu se feagaiga aloaia i le va o Niu Sila ma le European Parliament i se taimi o i luma. E ui o loo iai atunuu o Europa o loo faaletonu le tulaga o latou tamaoaiga, peitai ane, o Europa atoa lava ia i lona tulaga aoao e sili atu lona malosi tau pisinisi ma tupe maua i lo Amerika.
O le isi foi itu e tāua ai se feagaiga aloaia ma le European Parliament ona o atunuu o Europa lea e aupito i sili ona maualuga i ai le faatau o mamoe Niu Sila.
E NZ$ 1.67 piliona tala Niu Sila lea e faatau i tausaga taitasi i atunuu uma o Europa. I le faatulagana foi o maketi o loo faatau i ai le aotelega o oloa mai Niu Sila e muamua Ausetalia, sosoo ma Saina ona pito loa lea i ai ma Europa.
O lona tolu, ia maua avanoa ma sui o le Palemene aoao a Europa ia malamalama atili ai i mataupu o loo ave i ai le faamuamua a Niu Sila, aemaise mataupu e ono tutusa ai talitonuga a atunuu mai Europa ma Niu Sila.
O nisi o nei mataupu e iai le faafetauaiga o oloa i le va o Europa ma Niu Sila, o faiga faavae auā le puipuiga o le siosiomaga, ma avanoa e galulue faatasi ai i le vasa Pasefika ma isi vaega o atunuu tau Asia.
O taeao matou te feiloai ai ma sui o le Malo a Denmark, aemaise le Minisita o le Va i Fafo a Denmark ma komiti o le Palemene o loo nafa ma galuega tau i le va i fafo, poo le faafetauaiga o oloa a Denmark i fafo.
Ua faamuamua Denmark ona e lelei tele le va o le Palemene a Denmark ma Niu Sila. E 5.5 miliona le aofai o le toatele o tagata i Denmark, e tai tutusa lava foi ma le aofai o tagata o loo i Niu Sila.
E $230 miliona tala Niu Sila le aofai o oloa Niu Sila o loo faatau e Denmark. O le tele o nei oloa e aofia ai le paka Niu Sila, le mamoe, povi, ma le uaina. E $$215 miliona tala Niu Sila le aofai o le tau o oloa e faatau e Niu Sila mai Denmark.
Na muamua lava asiasi mai le Masiofo a Denmark i Niu Sila (Queen Margrethe, Queen of Denmark) i le tausaga 1987. A o le tausaga 1993 na muamua asiasi ai se minisita mai Niu Sila i Denmark. E lē gata i minisita a le Malo a Niu Sila ua asiasi atu i Denmark, ae sa faapena foi ona toatele Minisita o le Malo Denmark ua asiasi mai i Niu Sila.
O loo iai feagaiga i le va o Denmark ma Niu Sila e mafai ai ona malolo mai tagata matutua ua ritaea mai Niu Sila i Denmark ma e faapena foi tagata matutua ua ritaea mai Denmark i Niu Sila. O lea feagaiga ua faamautu ai le tausiga o tagata matutua mai Niu Sila ma Denmark poo fea lava le atunuu e malolo ritaea i ai. O lea feagaiga na faamautu i le tausaga 1997.
E lē gata i lea o loo iai foi se feagaiga e mafai ai ona tafafao mai tupulaga talavou mai Niu Sila ma galulue mo le tausaga e tasi i Denmark, faapena foi tupulaga talavou mai Denmark e mafai ona asiasi ma galulue i Niu Sila mo le tausaga e tasi. O lea feagaiga na faamautu i le tausaga 2001 ma ua ta‘ua o le ‘working holidays arrangement’.
O le a toe faaauau atu pea lea tusitusiga ona o lea ua valaau mai le matou vaalele mai Dubai i Copenhagen…………
