Ua i le Toomaga mo e Puapuagatia i le taimi nei se tagi a se tina e 21 tausaga le matua ona o se faaoogalima matuia na ia tuua‘ia na faatino e lona toalua e 35 tausaga.
O le tamaitai e suafa ia Ivona Tupuola Kioni ua matuā afaina lava le alafau taumatau – o lana tala na tu‘i ia lē iloa se mea ae ala a‘e ua matuā leaga foliga ma tiga atoa lona alafau. O iinā na iloa ai na u e lona toalua ia ae e lē o iloa se mea.
O Vaimoso na tulai mai ai lea faalavelave. O se Aso Fanau na agai mai ai lea ulugalii e tafafao ai.
“E ita lo‘u toalua i le masina o Setema na tulai mai ai le faalavelave ae o le vaiaso lenei faato‘ā oo mai ai loa lea tamaitai i le Toomaga mo e Puapuagatia e ta‘u i ai le faalavelave lea ma se isi foi vevesi na tulai ma i le vaiaso lava lenei na toe tatu‘i ai foi foliga e le toalua lava lea.
O se uiga masani o le toatele o tamaitai ua aafia i sauaga i totonu o aiga, o le faatali lava seiloga ua sosoo sauaga e faia ia i latou ona faato‘ā agai loa lea mo se fesoasoani.
O foliga vaaia la o manu‘a nei ua fia vaai i ai ae o le taimi na faato‘ā tulai mai ai lea faalavelave na ta‘ua e lenei tamaitai na matuā leaga lava ona foliga.
O le uluai faalavelave lea na u ai ona foliga na ta‘ua e lenei tamaitai – e matuā faigofie lava le mafuaaga e pei ona ia ta‘ua o le ita i le talanoa i le tausoga o lona toalua.
“Na muamua togi lo‘u vae i le iputi ma ou te matuai lē iloa lava pe aisea ae mulimuliai ai ona fai ma tuliga ma ou sulu ai i se tasi o potu o le fale o le aiga i Vaimoso i le fia maua o se laveai,” o le isi ana faamatalaga lea.
Sa ia faamatalaina na talepe e lona toalua le faitotoa o le potu ma oso atu loa i totonu ua tatu‘i ona foliga ma lē iloa ai loa ma se mea. Ma o le va la lea na ia ta‘ua na ia faalogoina ai ua tau i lona faiai le tiga o lona ulu ina ua u e lona toalua ona foliga ma e faalua ona fai lana amio lea.
O le taimi nei o loo iloga lava manu‘a nei i foliga o lenei tina talavou ma e faailoga fesili le toe alu ese ma le lē toe alu ese.
O se itu na ta‘ua e le tamaitai, e lei mafai ona oo i le falemai mo se togafitiga ona ua taofi e le aiga o lona toalua e togafiti i tua ona manu‘a.
Ae o le fasiga lona lua o ia, na ia ta‘ua ai na alu atu ai le fafine sa nonofo muamua ma lona toalua i le la fale i Siumu ma fai ai loa ma fusuaga i le Aso Gafua o le vaiaso lenei.
Sa ia ta‘ua le tiga ma matuitui o le toe alu atu fua o le fafine lea a o lea ua savali i le tolu tausaga talu ona nonofo ma lona toalua, ma o le fasiga lea o ia na leaga uma ai foliga i le tatu‘iga e lona toalua ma tonu ai loa i lona mafaufau o le mutaaga lea o le la aiga.
“Ua lē o toe iai ma so‘u alofa o totoe mo lo‘u toalua ona ua ia faia se mea e sili ona faagalo gata,” o lana tala lea.
O mataupu faapea ua lē asa se vaiaso ma le feagai ma le Toomaga mo ē Puapuagatia ma e eseese lava auala e faaoo ai manu‘a i tamaitai ma fanau – a lē o le tu‘i o le ulu i le maa, o le tatu‘i o foliga ma o le ā lava le meatotino e tau atu i ai le tamā ua velo ai lava.
O le tamaitai talavou lenei ua faaopoopo nei i se lisi ua faatuputupulaia pea o tamaitai sauaina o Samoa.
O loo taumafai galuega e tele ina ia ave le lapataiga i alii o loo faatino nei sauaga ae e foliga mai o loo faia pea ma o loo nanā e le tele o aiga nei faafitauli e lē o lipotia i leoleo ma faalapotopotoga o faia galuega alofa e tali atu ai i nei uiga i totonu o aiga.
O le oo mai lava o lea tamaitai i le Toomaga mo e Puapuagatia na logo ai loa leoleo ma o le vaiaso lava lenei na taofia ai e leoleo lea alii, le toalua o le tamaitai ma fesiligia i nei tuua‘iga aemaise o le faamautu ai o moliaga faasaga ia te ia.
A o sauni atu le Toomaga e faamanatuina le aso o le “Lipine Paepae” lea e fitoi tonu lava mo le tetee atu i le sauaina o tina i totonu o aiga, o se mataupu lenei ua toe fagufagu mai i tina uma o loo feagai ma sauaga ina ia faailoa ma ia aua le taumafai e nanā mataupu nei auā o le tele lava o taimi e iu lava i le oti.
