Faafetaia e le Palemia le USO i galuega mo le Kanesa

O le taamilo i Samoa atoa ina ia faalauiloa aafiaga o le gasegase o le kanesa, auala e taofia ai ma auala e maua ai se fesoasoani mo togafitiga, o galuega nei na faafetaia e le Alii Palemia o Samoa ina ua mae‘a le taamilosaga a le faalapotopotoga a alo o Samoa mai i Niu Sila le USO e pei ona faapuupuu ai.
E lua vaiaso na taamilo ai nei alii ma le faamoemoe ina ia mafai ona oo atu i afioaga i tua. O se fesootaiga ma le Faalapotopotoga o le Gasegase lenei o le kanesa i Samoa faatasi ai ma le fesoasoani maua mai i le Faalapotopotoga o le Soifua Maloloina a le Lalolagi – (WHO), o le Matagaluega o le Soifua Maloloina i Samoa (MOH) ma le Matagaluega o Mataupu tau Tina ma Tamaitai, Atinae o Nuu ma Aga Fesootai ua mafai ai ona faatino lenei faamoemoe.
O le toe taliu mai i Savaii o le au tietieuila, ua mae‘a ona o latou taamilo i se umi e 400 kilomita na faia ai se sauniga puupuu i Apia ma faafetaia ai loa e le alii Palemia o le atunuu ona o le iai o le lagona alofa ma le finau o nei alii, o ni alo faasino ia Samoa ae o loo nonofo ma galulue i Niu Sila e fai se galuega alofa mo le toatele o tagata Samoa ua aafia soifua ona o le gasegase o le kanesa.
O se taumafaiga lenei a le faalapotopotoga lenei ua iloa ai i Niu Sila ae o lea ua faasoa mai lenei alofa i tagata i Samoa lava ia. Na talafeauga lelei le mae‘a o lenei taumafaiga ma le faamanatu ai o le aso e Leai atu ai i le Tapaa, ma o le tuualalo lea a le taitai o le atunuu, ina ia taumafaiga tagatānuu o Samoa e tuu le taumafa tapaa auā o le auala lea ua faamaonia le aupito toatele ai o tagata o Samoa ua aafia i le kanesa.
Faaalia e le Alii Palemia le faafetaia o le tutufaatasi o ofisa o le Malo ma faalapotopotoga tuma‘oti e tali atu i lenei faafitauli tele ae o le a faapea ona tuu atu pea i le faitalia a le tagata, ina ia tali atu e tausi le soifua maloloina ma tau taofiofi ai lenei gasegase mai i le sosolo faaafi i Samoa.
O le kanesa o ona ituaiga eseese o le gasegase lea ua lona lua le maualuga o le numera o tagata Samoa ua maumau ai soifua ma o le tuaa o se tasi o le USO na maliu ai ma manatu ai loa e unai le soifua maloloina o tagata Samoa ma isi o le Pasefika ina ia tuuitiitia ai le numera ua aafia i le kanesa.
O le faafetai a le Asosi o le Kanesa e pei ona saunoa i ai lana Peresetene, Leiataua Lesā Daryl Clarke o le tali mai o isi faalapotopotoga tuma‘oti ma ofisa o le Malo i le taumafai malosi lea e faalauiloa soo se tasi i Samoa lenei gasegase.