Fetu pupula i fusuaga – Joseph Parker

O se tulaga maualuga ua ausia nei e le alii Niu Sila i le paga mamafa (heavyweight boxer) ia Joseph Parker ua pei o ni foafoa le lagonaina o lona tulai mai i totonu o Las Vagas i se togalauapiga o loo auai atu i ai le alii fusu. O se alii talavou talenia tele i lenei taaloga aemaise ai le avanoa o loo galulue faatasi ai ma le alii ia Kevin Barry.
Na taunuu mai i le afiafi o le Aso Faraile na se‘i mavae atu nei le alii fusu mai Nevada i Amerika i le nofoaga tonu o loo galulue ai ma le alii o Kevin Barry lē sa avea foi ma Manager ia Toaletai David Tua.
I le vaitaimi a o aumau ai le alii fusu ia Joseph Parker ma Kevin Barry o i lea na maua ai avanoa e fusu faataitai ai ma le alii ia Brice Ritani mo taamilosaga taiono.
O loo saunoa Joseph Parker ua mataala ai ona mata i le lumanai o loo mafai ona siisii atu ai lana taaloga i le lumanai, aemaise ai lava le maualuga o faipelega ua iai nei ua atili lautele atu ai lana vaai i le lumanai.
I le faatusa o le lelei tele o le avanoa sa iai le alii o Joseph Parker i Amerika, sa feiloai ai ma nisi alii fusu logologoā o faipelega. O se tasi o vaega tāua na ta‘ua e Joseph Parker ua avea le avanoa na tuua ai aiga ma malaga atu i Amerika, ua aoaoina tele ai lona mafaufau ae iloa ai le tele o isi vaega o fusuaga sa lē iloaina muamua.
Sa faafiafiaina le alii ia Kevin Barry i sauniuniga a Joseph Parker i le la fusuaga ma Francois Botha e ui ina matua le alii Aferika, ae i le tulaga talavou o le alii ia Joseph Parker i tausaga ae ua matua i le mafaufau e faia ai le taaloga o faipelega.
O le afiafi la o le Aso Tofi o le vaiaso nei lea o le a faataunuuina ai lenei fusuaga i Aukilani. Tatou talosia ia le taumafaiga a lenei foi alo o le atunuu faatasi ai ma nisi o le a faipele ai foi i lea afiafi.