Tatala nofoaga fou o le PIPA

O le matautia o taumafaiga a lenei aoga, le PIPA (Pacific Institute of Performing Arts) i lona tulaga maualuga ua ausia nei, o le mafuaaga lea o le siitia atu o le aoga i lona nofoaga fou e pei ona iai le faatasiga sa molimauina e le atunuu i le Aso Faraile na tea nei, i le faapaiaina lea o le faleaoga fou.
O se aso sa leva ona fuafua mai ma tuuina i talosaga molia ina ia faataunuuina ma le manuia, peitai e moni ai le upu, o se faamoemoe ua taunuu o le laau o le soifua lea.
O le PIPA o se polokalame o loo lagolagoina e le Best Training, ua fitu tausaga talu ona amatalia, fitoitonu lana auaunaga i le atinaeina o taleni ma agavaa o tamaiti Pasefika i le faatinoina o ata tifaga, tala faatino, taleni pese ma siva, aemaise o le aoaoina o le tomai o le fanau aoga, e mafai ai ona agavaa e galue faafaasalalau i luga o alaata ma televise, ma le tele o nisi avanoa faigaluega e mafai ona maua ai.
O se polokalame ua maitauina lona lelei faatino, ma ua tele tamaiti Pasifika ua manuia ma iu mai aoaoga o loo ua galulue nei i televise aemaise o le faatinoina o ata tifaga i totonu o Niu Sila.
O le PIPA e pei ona silafia, ua leva tausaga o faatautaia ana aoaoga i le Unitec Campus i Mt. Albert, peitai o le Aso Faraile o le faaiuga o le vaiaso na tatalaina ai aloaia lona nofoaga fou i le 48 Rosebank Road i Avondale.
Ua manatu le toatele ua talafeagai tonu lea mo le toatele o nai tamaiti Pasifika e fia aoaoina, peitai ua fai tele sina mamao ma Aukilani i Saute, le nofoaga o loo tele ina alala ma papaaao ai le toatele o fanau Pasifika. O lea ua faafaigofie le nofoaga, auā ua taulai i le ogatototonugalemu o Aukilani.
O le afioga i le pulenuu o Aukilani Len Brown, na saunoa faapitoa i le tatalaina aloaia o le fale fou mo aoaoga a le PIPA faatasi ai ma se sauniga lotu puupuu, a o lei alo le fanau aoga ia latou faafiafiaga tuufaatasi ma tama ma teine tuai o le aoga, faapea le taumafataga na taualuga ai le aso.
O le PIPA o loo vaaia ma faatautai e (Directors o le aoga), o Goretti (Letti) Chadwick o se tamaitai ua faauu mai le UNITEC School of DSScreen and Performing Arts ma e tele ata tifaga ma tala faatino sa auai ai, aemaise o le polokalame a le FRESH i le TV 2 o loo faatino ai le vaega Pani & Pani ma le alii o Sean Coyle, ua iloga foi lona iloa ma le agavaa i polokalame tau televise,  o i laua ia o loo faauluulu ia le polokalame lenei a le PIPA.
Toatele le auvalaaulia o sui maualuluga o le malo na auai, o aiga, uo ma ē masani a le PIPA na auai ma molimauina le matagofie o tapenaga a le fanau aoga, aemaise o le fia maimoa o le lautele i le  nofoaga fou ua see nei iai le auaunaga a le PIPA.