O se nofoaga i totonu o Magele i Opowa, o se tasi lea vaega o loo tele ina nonofo mautotogi ai nisi o tagata eseese ma o latou aiga. O se nofoaga o loo fefiloi i tagata eseese o le Pasefika, ma o loo vaevaeina i ni aiga se 3, o Pasefika (Lodge), Oceanic (Lodge) ma Norfolk (Lodge).
Ua tele tausaga o nofoia lea nofoaaga ae sa taumafai lava le pulega o nei aiga e tolu e fai se auala e faamasani ai le isi aiga i le isi aiga faatasi ai ma le nofo fealofani o tagata uma, auā o nei nofoaga o loo iai tagata Maoli, Niue, Tonga ae taulamua ai lava Samoa.
O le faatalitali ai o le Pepe o le Kerisimasi o le tausaga 2014 na a‘e ai loa se finagalo i le susuga ia Allan Eaton o ia lea o loo faauluulu ai nei fale e tolu, faatasi ai ma le susuga ia Angela (Owner) faapea Aliitasi Falealii (Lodges Managers) e fai se polokalame o le Kerisimasi e mafuta faatasi ai tagata uma o loo nonofo i totonu o lenei nofoaga.
Sa lē teena e aiga auā foi ua maua le auala ma le avanoa e talatalanoa ai ma galulue faatasi tagata uma, lea sa latou faatinoina ai loa ni faaevagelia ma nai tala o le Kerisimasi faatasi ai ma ni siva a atunuu taitasi o loo iai o latou sui i totonu o lenei nofoaga.
O le aso 23 o Tesema 2014 na faataunuuina ai loa lea faamoemoe i le nofoaga lava lenei i Magele. E tasi le aso na faatinoina ai lenei polokalame, ma sa vaaia le toatele o aiga uo na agai atu e molimauina lenei tuufaatasiga tāua.
Na tatala i le sauniga lotu ma faagasolo ai loa aitema a aiga taitasi. E taga eseese lava faiga a tagata, e fai o tagata matutua ae o tamaiti foi i le faatinoina o a latou aitema. Sa galulue uma aiga i le faatinoina o a latou polokalame, e pei o siva a atunuu eseese e sisiva uma ai lava tagata o isi atunuu.
Na mae‘a lenei faamoemoe ma ua toe fuafua ai foi ma le isi polokalame e faatinoina i le Eseta o le tausaga nei lava.
