“Tāua tele le avanoa tutusa o alii ma tamaitai”…Leaupepe Fatu Pula
E toatolu ni tamaitai leoleo o le Malo o Samoa ua sauni e faatino tiute o le puipuia ma le tausia o le filemu i lalo o le faamalu o Malo Aufaatasi o loo ofoina lea auaunaga ma tautua.
Ua faaalia mai e le sui sooupu o le matagaluega o leoleo le feagai o ia tamaitai leoleo ma a‘oa‘oga i le faaaogāina o aupega e pei o laau malosi, atoa ai ma a‘oa‘oga i le puipuiga o lo latou saogalemu, a o lei malaga mo le atunuu o Timoa i Sasa‘e.
O tamaitai o le a malaga e aofia ai Faagoto Patu, o loo umia le tulaga leoleo asiasi poo le inspector, faapea tamaitai leoleo o loo umia le tulaga satini o Vaalele Tofa ma Kukuana Tavita.
O se taimi muamua lenei ua malaga ai se vaega o tamaitai leoleo Samoa e aunoa ma se alii leoleo mo tiute o le puipuia ma le tausia o le filemu i lalo o Malo aufaatasi, e ese mai i nisi o tamaitai o loo tofia mo tiute faapea i totonu o Solomona i lalo o le vaega e ta‘ua o le RAMSI poo le puipuiga a Malo o le Pasefika o loo taulamua ai Malo o Ausetalia ma Niu Sila.
O le tamaitai o Faagoto Patu o lona tuaa le afioga Mataafa Pu‘ela Faasuamaleaui Patu sa galue foi i le matagaluega o leoleo mo le tele o tausaga a o lei filifilia e avea ma Sui Ao.
O le toalua foi o le tamaitai leoleo asiasi sa avea ma leoleo a o lei filifilia i le tofi faipule o le Palemene mo itumalo o Faasaleleaga Numera 4 le Afioga Vui Tupe Ioane.
Faaalia e lea tamaitai leoleo le matuā faagaeetia o le loto ma le agaga ina ua filifilia o ia faatasi ai ma isi tamaitai leoleo e toalua mo ia tiute tāua ma ua sauni e faatino puipuiga o le filemu i Timoa i Sasa‘e.
Faaalia e le sui sooupu o le Matagaluega o Leoleo, o tamaitai leoleo o le a malaga sa talosaga mo ia galuega i totonu o Darfur i Aferika, peitai na taunuu se fautuaga mai Malo Aufaatasi ina ia toe suia i Timoa i Sasa‘e ona o loo fai si maaleale o le tulaga saogalemu mo i latou i lea vaega o le lalolagi.
“O le mafuaaga lena ua faia ai le faaiuga a le Komesina e galulue i latou i Timoa, o loo iai foi isi leoleo mai Samoa”.
E pei ona silafia e le au faitau o le amataga o le tausaga nei na tuua ai foi e nisi alii leoleo mai Samoa le atunuu mo lea atunuu auā lava galuega o le puipuiga o le filemu.
O le aumalaga lea na fuafua e malaga ai ma se tasi sa avea ma Komesina o Leoleo, le susuga ia Papalii Lorenese Neru, e avea ma faufautua ma sooupu. Peitai na toe faia le faaiuga a le pulega o le puipuiga o le filemu a Malo Aufaatasi e taofia o ia, ma e lē o iloa le mafuaaga.
O loo fuafua foi se isi vaega o alii leoleo mai Samoa e malaga mo galuega o le filemu a Malo Aufaatasi i totonu o Dafur i se taimi o le tausaga nei.
