Na faateia le tina ia Iulia Faatau ma le fanau e toalima o le afioaga o Tulaele ina ua valaau atu le Kamupani o le Colonial a Fiti i lona lālā i Samoa nei.
O le valaau ona o loo iai se seleni ua fia tauaao atu i le tina ma le fanau.
E lei iai se manatu o lenei tina ma le fanau o iai se inisiua a le tamā e pei ona ia totogi ai le inisiua o lona soifua ma tusia ai le tina o le aiga aemaise o le fanau uma i lana saogatupe lea.
O le tamā o le aiga o Lemalu Alalafaga Faatau ma na maliu i le lua masina talu ai a o galue o ia o se Ofisa Sili Lagolago o le Matagaluega o Tupe Maua a le atunuu.
E tusa ma le $40,000 (tala) le tupe atoa ua avatu i le tina o Iulia ma le fanau e toalima.
O le kamupani la o le Colonial na faatino ai lea inisiua a le tamā, ma e na o le faafetai lava o le tina o le aiga ma le fanau ua tuua nei ae ua iai se fesoasoani ua tuu atu e le tamā o le aiga ua maliu auā lenei taimi ua lē toe mafuta ai.
O le tina ia Iulia e galue faafaiaoga ma o loo nonofo pea o ia ma si ana fanau i Tulaele.
Ua maualuga lava le numera o tagata Samoa ua tele ina vaavaai i faalapotopotoga ma pisinisi ua faatautaia inisiua ina ia avea ma saogatupe e tua i ai taitoalua ma fanau i taimi e maliliu ai.
E lē o se faiga na masani ai ona o le manatu taatele ua faia fuafuaga o le oti o le tagata. Peitai ua tele lava ina talia e le toatele le manaoga ina ia iai se teugatupe mo ē pele i taimi e tuua ai mafutaga, ua agai nei e faatino ia ituaiga teugatupe.
E pei lava ona silafia o se faiga lea ua masani ai tagata i atunuu mamao ma o le NPF lava ma le Faalapotopotoga o le SLAC (Samoa Life Assurance Corporation) o faalapotopotoga ia a le Malo ua iai teugatupe faapea mo i latou e fai saofaga i taimi e maliliu ai.
Mo le tina o le aiga, o le a faaaogā lenei seleni e pei ona tofu siaki uma ai lava ma lana fanau i ni fuafuaga a le tagata lava ia aemaise o le fesoasoani ai i a‘oga a le fanau laiti o loo aooga pea.
