O loo suesueina nei e leoleo le mafuaaga o se faalavelave tau taavale na aafia ai le Minisita o Faasalalauga ma Fesootaiga e pei ona faaalia e se molimau, o le po o le Aso Sa na tulai mai ai lea faalavelave i se vaega o le alatele i Saleimoa.
Faaalia e se molimau faatuatuaina o se loli a le faalapotopotoga o le malosi tau eletise le EPC na fetoai ma le taavale na malaga mai ai le minisita mai le malae vaalele, ina ua taliu mai i le atunuu i se malaga faalemalo sa tuua ai le atunuu.
E manu‘a mitimiti le minisita e pei ona faaalia sa taofia i le falemai mo na o le po o le Aso Sa ae ua toe tea nei i tua.
Ua taofia nei e leoleo le ave taavale o le loli a le EPC ma ua molia i le ave taavale faatamala ma le matautia ua oo ai ni manu‘a i se tagata.
O loo molia foi i le ave taavale onā. I se lipoti i le taeao nei ua faaalia ai o le ave taavale o le suetusi sinia poo le chief auditor a le faalapotopotoga o le EPC le susuga Tofilau Afereti Leki Afaraima.
Ua ta‘ua e faapea ua faia le faaiuga a le pulega o le malosiaga tau eletise e faamuta loa le toe avea o Tofilau ma tagata faigaluega a le faalapotopotoga ona o le faalavelave tau taavale ua aafia ai se meatotino a le EPC, aemaise o le aafia ai o le taavale a le Malo o loo faaaogā e le Minisita o Faasalalauga, toe aafia ai le minisita e ui e lē tuga ia manu‘aga.
