‘Aua nei ‘ai ulu, ona faatuatuanai lea o taisi’
O faiva alofilima o mātua e mamanu ma faufau fanau auā o i latou ia o anofale o se aiga, latou te faaauau tofi poo le aiga, o i latou foi e malu ai aiga, ae o le anofale o soo se faleaoga ia a‘oa‘oina fanau ia maua le poto, auā a lelei fanau ua lelei aiga, nuu ma ekalesia.
O le afiafi o le Aso Faraile na toai taunuu ai i Kalaiesetete nisi o asosi Iunivesite e pei o Aukilani, Waikato ma Vitoria ma na maua avanoa o latou Peresitene pei o Tim Paice, Tuu Moli ma Filoitumua e faatalanoa ai i luga o le polokalame a le Penina o Samoa 96.9 Plains FM mo le faamoemoe.
Ae o le aso na sosoo ai na ofaga potopoto ai loa alii ma tamaitai Samoa o loo a‘otauina i Iunivesite a Niu Sila i le latou sootaga masani lea na talimalo ai Canterbury mo lenei tausaga.
E lima asosi na auai, e pei o Aukilani, Auckland University of Technology (AUT), Vitoria, Waikato ma Canterbury. Sa lē mafai ona faatasi mai Otago ma Massey ona o tuatuagia i vasega.
Na uluai fesilafai i le ‘ava o le feiloaiga, lea ua faatasia lupe faalele a le atunuu, ua fesilafai i le laau a le tamaitai ma ua faapena ona lululima ma faatalofa i le manuia ma le fiafia.
E pei ona silafia o le auga lava o sootaga faapenei o le fuifui faatasi o alo ma fanau Samoa i le latou aganuu ia faamalosia, o fetufaaiga faaleaoaoga, o faaevagelia ma taaloga.
Auā foi o le aganuu na te faailoilo, faamaopoopo ma pulea le tamaliiaga o se tagata ua soifua i lona atunuu, e pei foi la o le tama ma le teine Samoa, ma o le autū e taialaina ai le latou mafutaga o le “Ai ulu tuanai taisi”, lea e pei ona filifilia e le asosi a Canterbury.
Ina ua mae‘a le fesilafaiga ma se taumafataga o le taeao, ona sosoo lea ma tauvaga lauga i le gagana Samoa ma le faa-Peretania. Tasi lea vaaiga felanulanuai i le loloto o mafaufauga na fafau ai lauga, ma sa faigata tele i faamasino ona fai se faaiuga i le lelei tapena o le fanau, ae manatua foi e lē mua uma ni vaa.
Na faatasia uma asosi i le latou lotu tuufaatasi ma usuina a latou peselotu filifilia, ae o le afiafi o le Aso Sa i le Ekalesia St Pauls Pacific Trinity Church, i lalo o le ta‘ita‘iga a le faafeagaiga Rev Lapana Faletolu na alo atu ai le fanau mo a latou faaevagelia eseese.
Na maitauina le matagofie o tapenaga faaleagaga, ma sa faaautū uma i le ta‘iala o le mafutaga, saili malo ia fai ma le loto tauivi ma ia aua ne‘i galo mātua, tautuana lau agaifanua, o a faigata e oo mai ia faamuamua le Atua i le olaga.
O le afiafi o le Aso Gafua sa faatumulia le nofoaga i totonu o le Iunivesite i le mamalu o le atunuu, aemaise mātua ma aiga mo le maimoaina o tauvaga i faafiafiaga faaleaganuu, o le taualuga foi lea o le sootaga 2010.
O tulaga sa lautogia ai e pei o le ulufale mai i totonu o le ausiva, mauluulu, faataupati, sāsā, pese o le aso, taualuga ma le ulufafo o le ausiva ina ua mae‘a le latou faafiafiaga, aemaise ai o togiga mananaia na vaaia i lea po.
O le susuga i le faifeau, Lapana Faletolu sa tatalo faafetai mo le amatalia o le faamoemoe.
O le alii faiaoga o Dr Iati Iati ma lona faletua o Fara sa fai ma fofoga o le po (MC), faatasi ai ma faamasino e toatolu, aemaise ai o le fesoasoani malosi a le faletua o Liz Keneti (UC Pacific Development Team).
E 4 asosi sa mafai ona tauva, matagofie tapenaga uma i fatuga o pese, o taga eseese, e leai se fia moe e maua ai.
O le tele o le pauna ata ona o le mālie o le faaluma a le alii saasaa o Aaron Ryan mai le asosi Iunivesite AUT.
Sa felanulanuai le aulelei o alii fuataimi ma le onomea, aemaise ai le alii Peresitene o le AUT, Albert Tupuola i le mataina o lana tatau, o ia foi sa fuataimi.
E lē lava le gagana e faamatala ai le matalasi o sauniuniga a Iunivesite i lea po, e oo lava i manaia sa saasaa mo le taualuga mai Iunivesite Aukilani, AUT, Vitoria ma Canterbury, e ese le faatamalii o sausaunoaga.
O le iuga na tulaga muamua AUT, tulaga lua Aukilani sosoo ai ma le laumua Vitoria ae tulaga fa Canterbury.
Na manumalo foi AUT i taaloga, ae sola Canterbury ma le Academic, i le tuufaatasiga o maka i le laugatogi ma le tufatufaina o faailoga.
Ua toe manumalo aoao ai le asosi Iunivesite AUT, e pei foi ona latou mauaina i le 2009.
O le sootaga i le tausaga fou 2011 pea aulia, o le Iunivesite i Waikato o le a talimalo, auā e faigata le laueleele tapu o loo afio ai le aiga tupu tagatawhenua Maori.
Ae manatua le manulauti o lenei tausaga tupulaga e, ‘Aua nei ‘ai ulu ona faatuatuanai lea o taisi’.
Ua siitia le poto salalau ae faamanatu atu pea le tulafono e lima, ma aua ne‘i galo mātua ma le Atua.
