E pei ona silafia o le vaiaso ua mavae sa faapitoaugafa mo tina ma tamaitai o le lalolagi (International week) lea sa faamanatuina i le Aso Tofi aso 7 o Mati. E maeu le manaia o se mafutaga ae maopoopo ma auaumea faatasi e ala i le fealofani.
O le komiti sa o latou faamaopoopo lenei aso faapitoa mo le mafutaga tuufaatasi sa faia i le pitonuu o Inala, e aofia ai le tamaitai Toga o Inez Sione faaipoipo ia Tagoiaega Bruce (alii Samoa Glenala State school Liaison Officer), o Inez sa avea ma fofoga o le faamoemoe.
O Glenda Stanley mai le Iunivesete a Grifith, Salome Swan, Kareena Clifford o le Soul Pacifica na ia foaiina ni meaalofa mo tina sa auai i le Aso Tofi na tea nei, Valami Waqaliva mai le polokalame a le Good Start ma le tamaitai o Trin ma nisi sa lagolagosua.
O le uluai taimi lenei ua faia ai lenei faatasiga ma e toatele tamaitai ma tina Pasefika faapea Samoa sa auai. O le auga ma le sini ina ia fausia se mafutaga malosi e tutū ma galulue faatasi ai tina ma tamaitai Pasefika mai soo se gagana ma soo se atunuu o faaopea ma aumau i lenei setete. E iai le talitonuga e maoae le sili atu o le toatele o le isi faatasiga nai lo le uluai taimi.
Na faaiuina lea aso faapitoa i se taumafataga ma ta‘ape
ai le aofia.