E tolu vaiaso o mate le eletise i le tele o vaega o le atunuu ona o le afā o Eveni ia Tesema o le tausaga ua mavae.
O le mafuaaga muamua ua faailoa e le Malo na lē taunuu ai ona tatala aloaia le afi eletise fou i Fiaga, ma le mafuaaga lona lua, ua agai le aufaigaluega a le malosiaga tau eletise e faia galuega mo le toe faaleleia o vaega o le eletise na faaleagaina i le afā.
O le faaiuga o le masina o Fepuari ua mae‘a atu nei na faatulaga e tatala aloaia ai lea atinae a le Malo peitai o ia mafuaaga ua toe taatia ai nei se‘i faatoa faataunuu i le aso 25 o le masina fou o Aperila.
E silia i le 300 miliona tala Samoa le tau atoa o le afi eletise na faatupe i se fesoasoani mai le faletupe o atinae o Asia le Asian Development Bank, e tauala mai i le agalelei o le Malo Iapani ma Ausetalia.
E tusa ma le 34 tesimale 9 megauati o le eletise o le a maua mai i le afi fou, ma e tolu afi tetele o loo i le fale eletise i Tanugamanono o le a siitia i le afi i Fiaga, faaopoopo i ai ma ni afi fou se lua. O le aso lava e tatala ai Fiaga o le a tapunia ai loa ma le afi eletise i Tanugamanono.
