O se tamaitai ma se alii ua toalua ia i laua ua toe faafoi nei i Samoa a o lei mae‘a tausaga e lima e tatau ona aooga ai i Saina.
O i laua nei sa faamanuiaina i le tausaga na tea nei i ni avanoa faasikolasipi e aooga ai i Saina. Ma ua faaalia mai o lea ua toe iai nei i Samoa le tamaitai, ona o ia na muamua toe foi.
O le faamatalaga o le toe foi mai o lea tamaitai ona ua manatu, ua fai lava ma maua i ma‘i o le tino ma na iu ai lava ina lē mafai ona faaauau ana aoaoga. O le tamaitai lenei sa aoaoina i le aoga mo tusitala i le vaega o matata eseese a le Iunivesite Aoao o Samoa, ma o ia le isi e toatolu i ai le vaega o le aufaasalalau na malaga i fafo i ia avanoa sikolasipi.
Na mae‘a ana aoaoga i le Iunivesite Aoao o Samoa malaga loa lea i fafo, ma o lea e lei leva ona foi mai i Niu Sila ae manuia loa i avanoa e lima tausaga e faalautele ai le tomai faatusitala ma faatagata faasalalau ae o lea e lei atoa le tausaga talu ona malaga atu ae ua toe foi mai.
Na faaalia e lipoti, e lua vaiaso o taofia i le falemai i Saina ae o lea ua maua ripoti o lea tamaitai ua maua i le ma‘itaga. Sa tāpā le vaega o loo nafa ma sikolasipi i le Ofisa o le Va i Fafo mo se faamaoniga o lea mataupu ma na ta‘ua e le tamaitai o Sharon Potoi, o le tamaitai ua toe foi mai ona o le ma‘i.
O le alii sa galue faaleoleo malaga ai i Saina i le avanoa sikolasipi, ae ona ua maliu lona tuaa, ua toe malaga mai ai, ma ua lē toe foi ai loa auā o tuutuuga, e lē mafai lava ona motusia le taimi atoa o lenei sikolasipi, le lima tausaga seiloga lava ua totogi atu e mātua se pasese e malaga mai ai sui nei e tafafao i le Kirisimasi i aiga, ae o le tuutuuga lava ia e lē mafai ona foi mai seiloga lava ua mae‘a le 5 tausaga lea ua faataatia mo nei sikolasipi.
O le masina o Aukuso o le tausaga na tea nei lea na malaga ese ai sui nei e toalua atoa ai ma le isi toavalu e atoa i ai avanoa e 10 o loo faamatuu atu e le Malo o Saina i alii ma tamaitai o le atunuu ua talosagaina sikolasipi i tomai eseeese o loo avanoa mo le malaga atu ai i lea atunuu.
O le taimi lenei, ua toe tatala mai talosaga mo avanoa ia, ma e to‘a sefulu i latou o le a faamanuiaina ai mo le sueina o faailoga o loo filifili e faalautele i ai le malamalama.
O ia avanoa, e lima tausaga le umi faatulagaina e aooga ai, ma e nonofo mau i Saina se‘i vaganā ua totogi e le aiga le pasese o le latou tamaitiiti ona mafai lea ona asiasi mai i taimi o faigamalologa.
O sikolasipi i Saina e mo tausaga uma, ma o le aso 15 o le masina o Fepuari o le tausaga nei, lea sa tatala ai avanoa mo talosaga, lea o le a toe tapunia i le aso 19 o le masina nei.
O le tele o mataupu faapenei i le toe faafoi faafuasei mai ai o sui e maua avanoa sikolasipi i atunuu mamao, ua matau ai o mafuaaga taatele o nei faaiuga e aofia ai le aafia o se tamaitai i le ma‘itaga poo se alii foi ua faaoolima i se isi tagata. E ese mai lea ia i latou ua lē ausia ni pasi i le faaiuga o suega i tausaga taitasi.
