O le tele o sulu e tele ai figota e maua, o le tele foi o lima e mama ai se galuega. O le finagalo o le itu agai o le faigamalo faasetete a Vitoria, e tatau ona tutufaatasi tagata atumotu o le Pasefika, mo le faaleoina o la latou finauga i le faatauaina o le mamalu gasolo mai e aumau i Ausetalia a o ni tagatanuu o Niu Sila.
Sa saoloto le gasolo mai ma maua loa fesoasoani mai le Malo, i le itu tau penefiti, ma soo se fesoasoani lava e manaomia, peitai o le tausaga e 2001 na suia atoa ai lea saolotoga, ina ua pasia e le Malo tele o Ausetalia le tulafono e pei ona iai nei, o le faatali lea mo le 2 tausaga poo le sili atu foi, faatoa mafai ona talosaga tagata ua 16 tausaga ma sili atu mo se penefiti maua mai le Centerlink, ae le gata i lea, ua faatali foi mo se vaitaimi faatoa mafai ona talosaga mo se visa nofo mau, ona faatoa talosaga ai foi lea mo se sitiseni Ausetalia.
O le mau tauave a tagata atumotu o le Pasefika, ua avea lea suiga ma tulaga ua faigata ai le soifuaga o nai aiga ma le mamalu gasolo mai i luma mai o le 2001, ona o le tupulaga talavou i le leai o ni tupe maua, aemaise lava pe a faigata ona saili ma maua ni galuega e fesoasoani ai i matua ma aiga.
O le ala foi lea ua faatuputupulaia ai le fuainumera o alo ma fanau a le Pasefika ua molia i soligatulafono e pei o le lima tagoese, faamisa, talepe fale ma le tele lava o isi soli tulafono.
Na fesili le taitai o le itu agai, le susuga ia Daniel Andrews pe aisea na umi ai ona faatali tagata o le Pasefika faato‘ā faaleo so latou manatu, ae o le tali, sa taumafai lava le atunuu ia e finau toatasi, ona toe saunoa lea o Daniel, ua tatau loa ona tutu ma galulue faatasi atumotu uma o le Pasefika.
E pei ona sa maitauina i le Aso Toonai aso 5 o Me, le mamalu o tagata iloga o le Pasefika pe tusa ma le 100 mai le tele o atunuu eseese sa auai i le uluai fono tuufaatasi a tagata atumotu o le Pasefika, sa faaleoina ai la latou finauga i le itu agai, ua iai se finagalo o le a toe faia se isi fono faapenei i le isi 3 i le 4 masina.
E tele ma anoanoai nisi o mataupu sa soalaupuleina, ae o le a logo puialiiina pea lo tatou atunuu i lo latou tino mai pe a toe faia isi fonotaga i le lumanai.
