(Toe tusia mai i se lipoti a le Asosi Siisii Uamea Mamafa)
E manino i ona foliga e lei atoatoa lelei lava lona malosi, ae o le loto lava e fai ai taaloga faapea, e pei lava ona saunoa soo ai le Numera Tasi a Samoa i le itupa o tamaitai i lenei faagatama o le siisii uamea mamafa, le tamaitai o Ele Opeloge.
Ua savali i le lua masina o gasegase lenei tamaitai ma na umi se taimi o tau saili tonu le ma‘i ua maua ai ona e fai o le vaivai ai o le tino, ae ua tulai mai ai ma faalavelave i totonu o le fale taaalo i taimi o toleniga, pa‘ū ai le tasi o uamea i le isi ona vaematua.
Faaiu ai toleniga ma taumafaiga e tausinio ona o le tigaina tele i lona vae ma i le ma‘i ua umi tele ona maua ai. E ui o lea o le a toe siaki lava e fomai na manino ai o loo ua aafia Opeloge i le fiva taifoi.
Sa iai se faaiuga a fomai i le faato‘ā agai atu ai o Opeloge mo siaki, o le vaivai o le tino o lenei tamaitai ona o le tulaga malosi sa iai ana sauniuniga i tausinioga faavaomalo o loma nei aemaise lava sauniuniga mo le faatumutumuga o taaloga faavaomalo, taaloga ia o le Olimipeka i Lonetona, Peretania i le faaiuga o lenei tausaga.
O le faaiuga sa faia e fomai i le oo atu ai o Opeloge ua manaomia le faamalolo o lona tino. Na iai fualaau aua le tali atu ai i le tino gagase, o le sau o le palapala i le isu ma le fiva o lenei tamaitai peitai e lei fai ifo ai le tigaina o lenei tamaitai.
Sa iai se popolega i le Asosi Siisii Uamea Mamafa ona o le itu lea, e ui o Opeloge o loo numera tasi i le taimi lenei i tausinioga a Malo o le Taupulega, e tatau lava ona toe faamautu lona avanoa e tausinio ai i Lonetona i le taamilosaga faavaomalo mo Malo o le Taupulega atoa ai Malo o lenei itulagi, le Oceania lea e talimalo ai Samoa i le amataga o le masina fou o Iuni.
O le toe siaki lava la o auga o le gasegase o Opeloge na faamautu ai loa i ni suesuega na faatautaia, e maua i le fiva taifoi.
Na vave ona toe suia fualaau ma togafitiga o lenei tamaitai, lea la ua mafai ai nei ona toe faafoisia le malosi i lea tamaitai ma ua amata foi la le galuega masani i aso uma o le siisii.
E mautinoa, e le na o le mamafa o uamea ua sii i aso uma o loo tauave e lenei tamaitai.
O loo faaopoopo i ai ma le mamafatu o le taumafaiga ina ia avea o ia ma uluai tagatanuu o Samoa i le au taaalo a Samoa nei, e manumalo i se pine mo Samoa mai i taaloga maualuga nei o le Olimipeka.
E leai se tasi ua ausia lea matatia mo Samoa lava ia. O taaloga o le Olimipeka i Saina lea na o le lua lava kilo le mamafa na oo i ai le sii a lenei tamaitai ma le na maua le pine apamemea, o lona uiga o lea ua agai Opeloge ina ia mautinoa lava e maua se pine mo Samoa i tausinioga ia o loma nei i Peretania.
O le faafetai a le Faiaoga, o le Peresitene foi lea o le Asosi Siisii Uamea Mamafa o Samoa, le Afioga Tuaopepe Jerry Wallwork, ina ia oo atu i taligamalo a Samoa mo le Sailiga Siamupini o Malo o le Taupulega ma le Oceania ia Iuni, ua toe foi le malosi o lenei tamaitai i le tulaga sa iai a o lei faataotolia i gasegase.
Faaalia e lenei tamaitai o le toe taumafai ai e foi i le malosi sa iai e le o se galuega faigofie i le taimi lenei aemaise ai o lea ua umi ona taoto ma le o toe sii ma o le vaiaso muamua lava o le toe foi ai i toleniga na matua lagona ai le faigata o le toe faafoi o le malosi i le tulaga sa iai.
O loo iai le isi tausinioga i le vaiaso fou i le aso 11 o Me, lea o le a faamautu atoatoa ai le ‘au a Samoa mo le taamilosaga lea ia Iuni.
E le o se taimi umi la ua sauniuni ai lenei tamaitai ae o lea ua faamalosi lava ia ia te ia ina ia mautinoa e maua le avanoa lea e toe tausinio ai a o lei oo i le taimi o taaloga tetele ia Iuni ina ia saga faamausali ai lona avanoa mo taaloga o le Olimipeka ia Aukuso-Setema o le tausaga nei.
Faaalia e lenei tamaitai o le aafia ai o le soifua maloloina e pei ona maua ai o lona manatu, o luitau uma nei mai i le Alii sei saili ai le malosi o iai ma le faatuatua ina ia lelei atoatoa ana taumafaiga ma ua ia talia ae o le a agai loa e sauniuni lelei mo taamilosaga tetele o lenei taaloga o loo loma nei.
