Faatupulaia faiga solitulafono i tupe a le Malo

“O la‘u faamanatu i matagaluega ma faalapotopotoga a le Malo ona e iai mataupu o loo suesueina”…Loia Sili

O le tausaga e 2007 na muai ave ai e le Loia Sili a le Malo, Aumua Ming Leung Wai, se tusi (memo) i matagaluega ma faalapotopotoga uma a le Malo sa logo ai tagata faigaluega i se faamanatu i le faaaogaina o meatotino aemaise o tupe o loo maua ia latou auaunaga.

“Ua fai si leva o la‘u tusi lena, ae talu ai nei sa ou toe ave ai se isi faamanatu ona e iai mataupu o loo suesueina e faasino i tupe o loo faaaoga solitulafono e nisi e pei o tupe o le petty cash”.

Faaalia e le Loia Sili o nisi o mataupu sa oo i le faamasinoga sa molia ai ni tagata faigaluega a le malo i le faaaoga faagaoi o tupe e ala i le aitalafu o le petty cash.

O lea seleni e faagaga mo vaetupe laiti e manaomia e se ofisa mo ni tupe faaalu i aso taitasi.

“A oo ina suesue nei moliaga o le mau a i latou e aitalafuina ia seleni, sa iai lo latou naunautaiga (intention) e toe totogi, ma o se defense malosi tele”.

Peitai a oo ina auiliili tulafono o loo pulea ai tupe a le Malo ma le atunuu le Public Monies Act, o loo manino lelei e le mafai ona faaaogaina e se tagata faigaluega a le Malo poo se isi foi tagata ni seleni i soo se auala e ese mai i aiaiga o loo faailoa e le tulafono e faaaoga i ai tupe.

O le molia o ni tagata faigaluega sinia sa faigaluega i le ofisa o le tiute i ni tausaga e lei mamao tele atu, sa agiga ai ini molimau a leoleo le iai oni faiga faaalatua sa aafia ai nisi o tagata faigaluega o lea ofisa o le malo.

O ia faiga sa aitalafu ai tupe e maua mai ile totogi o oloa eseese ma isi auaunaga a le ofisa o le tiute, ae toe togitogi atu.

O se faiga sa iu ina o pu ai ma tupe maua o nisi aso, ona ua tuai totogi ia seleni poo ua le toe totogia foi ae ua avatu ai seleni maua o isi aso ua tau faatumu ai le aofaiga o tupe ua le atoa.

E ese mai foi i ia faiga nisi o solitulafono o loo aafia ai seleni a le Malo, e pei o nisi sa molia ma ua faasalaina e le faamasinoga ona o le lima vavave i tupe a le Malo a o avea ma tagata faigaluega.

O loo tālia nei se faaiuga a le faamasinoga i moliaga e 30 ua faamaonia o se tasi o ofisa sinia o le Pulega o malaevaalele e mafua foi i moliaga o le gaoi a o avea ma tagata faigaluega.

E tusa ma le selau ma ona tupu afe se seleni na maua i suesuega faalotoifale a se ofisa suetusi na toesea a lea ofisa o le Malom peitai o le aofaiga o seleni sa molia ai lea ofisa sinia e $24,000 ma ona tupu.

O le isi tagata faigaluega sa tuuaia na sola ese ma Samoa a o faagasolo suesuega a leoleo, ma o loo nofo nei ise atunuu i fafo. Ua faaalia e leoleo o loo faia fesootaiga ma leoleo i le atunuu o loo iai lea alii mo le toe aumai faapagota i Samoa e tali i tuuaiga.