O le aso 15 o Me 2012 e faamanatu ai e le Faalapotopotoga o Malo Aufaatasi le Tāua o Aiga. O le aso faapitoa lea ua ta‘ua o le “United Nations International Day of the Family”.
O lenei tausaga ua faaautu lea aso i le faaupuga o le “ensuring work family balance”. O lona uiga ia maua le paleni i le va o oe ma lou aiga ma itula o e faigaluega ai.
Ua mafua le faataoto o le autu ua faaautu ai nei le faamanatu o le taua o aiga mo lenei tausaga, ona o loo maitauina pea le tele o suiga ua iai nei galuega ma tagata faigaluega.
Ua toatele le itupa o tamaitai ua agai e faigaluega. Ua silia ma le 52% o tamaitai uma o le lalolagi o loo faigaluega. O le afa o lenei fuainumera o tamaitai ua o e faigaluega ae e lei atoa le 3 tausaga o lana pepe.
O le isi foi suiga o le tuua lea o nuu mamao ae agai tagata e saili galuega i aai tetele poo taulaga. E le gata i lea ua toatele foi le aofai o tagata o loo feoai mai lea atunuu i le isi atunuu e sailiili galuega.
O isi foi suiga i galuega ua uumi itula faigaluega.
O nisi foi galuega ua faasoloatoa i le 24 itula le faasologa o sifi ua faafaigaluega ai tagata faigaluega. Ua tele galuega ua faaaogā uma lava aso e 7 o le vaiaso e faafaigaluega ai le aufaigaluega.
O le maitau o le faalapotopotoga o Malo Aufaatasi, ua avea nei suiga i galuega ma tagata faigaluega ua utiuti ai taimi o loo faaavanoa e aiga mo le vaaiga ma le tausiga o fanau laiti.
Ua atili ai ona faafaigata ona maua le paleni o taimi a tagata faigaluega e faigaluega ai auā le maua o totogi e tausi ai aiga, ma le faaavanoa o le taimi e tausi ai ma vaai ai fanau laiti, poo tagata matutua i totonu o latou aiga.
O loo fautuaina e le faalapotopotoga o Malo Aufaatasi faigamalo o atunuu eseese o le lalolagi ina ia silasila toto‘a i faiga faavae ma polokalame e fesoasoani ai mo le puipuiga o le aiga. Ia maua e matua ma latou fanau ni itula e mafuta ai. Ia maua avanoa aooga mo le fanau i se tau taugofie, ma ia maua tupe e fesoasoani ai mo le tausiga o fanau laiti.
Ua amata nei le finauga o ia mataupu i le Palemene o Niu Sila. Ua faataoto foi e le Malo a le National a latou fuafuaga e faavae i luga o latou talitonuga e tatau ona unai uma tagata o loo maua se penefiti mai le Malo ina ia o e sue ni galuega.
O le matou finau agai i le Malo e sese le taiala ua latou aumaia ma ave i ai le latou faamuamua. Sa tatau lava ona ave le faamuamua i galuega e faafaigaluega ai tagata. O fea galuega o le a unai i ai tagata e le o faigaluega? E le gata i lea e tatau ona tele avanoa aoga e agai i ai tagata ina ia maua ai ni tomai faapitoa ma ni faailoga ia mafai ai ona maua ni latou galuega.
Ae pito i sili lava ona faataua le maua o ni totogi maualuga mo le aufaigaluega e tausi ai latou aiga. Peitai o loo finau pea le Malo e ave le faamuamua i le unaia o latou o loo maua se penefiti mai le Malo, ina ia unai e o e sue ni galuega.
Ua tapena foi ni tulafono taufaaofi a le Malo ina ia taumafai e unai ese ai tagata mai le penefiti. E pito i sili ona aafia ai nisi o tina, aua o loo fuafua le Malo ina ia faamalosia le unai o tina e o e sue ni galuega ‘part-time’ pe a atoa le 5 tausaga o le matua o lana tama.
O le isi suiga e atoa loa le 14 tausaga o le matua o le tamaititi, e tatau loa ona alu lea tina e sue sana galuega ‘full-time’. Afai e le usitaia e tina lea tulaga e ono taofia le fesoasoani mai le Malo mo lea tina.
Fai mai se tasi polofesa mai le Iunivesite i Aukilani o loo nafa ma nei mataupu, ua faapea mai – ua tilotilo le faigamalo na o le vaega lava o tagata o loo maua le penefiti ma ua faapea o se mea leaga e tatau ona taofi le toe agai o tagata ia maua le penefiti. Ae ua galo ai le taua o tiute o loo tauave e le toatele o tina aua le tausiga fanau.
Fai mai le polofesa – ua unai mai lava e le Malo faapea o tagata nei o loo ola faamoemoe i le Malo o ni tagata leaga ma ua tatau ona sui latou olaga. Ua avea le unai mai e le Malo o le faaleagaina o tagata poo tina o loo maua le penefiti, ua faaoso ai i isi tagata Niu Sila e faaleaga latou o loo ola i le penefiti.
Fai mai a ia – e taua tele le faamoemoe o le fanau laiti i latou matua e tausi ma puipui latou. O ai e tausia le fanau laiti pe afai ua leai matua? A o ai e tatau ona totogiina le tausiga o fanau laiti? O le tali – o le Malo e tausia ma totogiina pe afai ua leai matua. Afai foi e le gafatia e matua le tausiga o fanau – e tatau i le Malo ona fesoasoani i le tausiga o ia Aiga.
Fai mai a ia – o le faavae o Malo Aufaatasi e faavae i aia tatau ma saolotoga e tatau ona maua uma e tagata soifua – ma o le aia tatau o tagata soifua uma ia iai ni galuega – ia lelei ni totogi e maua e le aufaigaluega – ma ia iai ni auala e tausi ai tagata pe afai ua leai ni galuega.
O le luitau ua aumai ia te au e lenei polofesa – e tatau i le komiuniti aemaise ona taitai ona taulamua e faamatala i le Malo le tele ma le anoanoai o faafitauli o loo feagai ma aiga talu ai le leai o ni galuega ma le faaletonu o totogi mo le aufaigaluega. E le gata i lea e tatau ona faataua e soo se atunuu le tausiga o aiga o loo iai se fanau laiti.
