O atugaluga o nisi o sui lesitala o le asosi o Taulasea Samoa i nisi o vaega sa fenumiai ma pogisa ai aemaise o tupe, ua masuiga mālie lea nunumi ina ua tau ane le faatamā o le asosi i le lipoti na agiga ai le faaseā a nisi o taulasea o le asosi.
O le faatamā o le afioga i le Palemia, Susuga Tuilaepa Lupesoliai Sailele Malielegaoi.
Na alu le aveai a le faatamā i le failautusi ma le peresitene o le asosi ina ia oo atu e tusa ai ma le lipoti ua folasia i ala e faatatau i atugaluga.
O le Aso Gafua, 7 o Me 2012 na feiloai ai le faatamā ma le peresitene le susuga Vaitogi Isaraelu ma le failautusi le faletua o Saumalu, ma faia ai loa le fautuaga i vaega e ao ona tapena i ai le asosi mo le faaleleia o vaega o loo tulai mai ai atugaluga o nisi o sui.
O le feiloaiga a le tusitala ma le peresitene i le Aso Lulu, 9 o Me 2012 i se tasi o fale Samoa o loo faaaogā e le asosi i tua atu o le maota talimalo o le Pulega o tagata Tafafao, na faamatala ai le peresitene i le latou feiloaiga ma le faatamā.
Na faaalia e Vaitogi ua ofo atu e le alii Palemia sana meaalofa tupe e $2,000 e fesoasoani e faasoasoa i sina iputi ma se pasese o taulasea o loo galulue.
“O se feiloaiga tāua tele ia te au aua ua mafai ai ona silafia e le faatamā nisi o faafitauli o loo feagai ma le matou asosi, ma e faafetai atu ai foi i lau susuga ona o lau foi pitolaau”.
Faaalia e le peresitene e tasi le afe selau se seleni sa iai a le asosi peitai e leai ma se tupe o totoe ona sa faaaogā i nisi o fuafuaga o faalavelave e pei o maliu ma mea e manaomia.
“Ua aumai le fautuaga a le faatamā ua lava le selau tala e ave i se maliu ae sue e matou se ietoga. Ua aumai foi lana fautuaga ia aua ne‘i toe lua ni taumafataga e pei ona sa iai o le ti ma le meaai mamafa, ae tau o se malu o le taeao mo taulasea ina ia faasaosao ai nai seleni e maua mo isi fuafuaga”.
O le $50 tala o loo totogi e le gasegase faato‘ā oo atu mo se togafitiga a taulasea ua fautuaina ai foi e le faatamā le ave o le $30 tala mo le taulasea e faia le galuega a o le isi $20 tala e tuu i le asosi e fafaga ai lana teugatupe i le faletupe.
“O se mea lelei tele lea ua faailoa mai e le faatamā aua e tatau lava ona manino vaega uma nei”.
O le finagalo lea o se tasi o taulasea sa faaseā ma fesilisili poo fea o alu i ai seleni o loo ao mai gasegase. Faaalia foi e lea taulasea, atonu o lea ua faataoto mai se alafua lelei e le faatamā e faatonutonu ai le pulea lelei o le latou asosi ina ia manino ma malamalama vaega uma.
Faaalia e le peresitene le susuga Vaitogi, e tusa ma le 102 sui lesitala o le asosi o taulasea uma, peitai o le taimi nei ua toe lava o le toaluasefulu sui o loo faamaoni atu i meafai ma galuega aemaise foi o le faaaogāina o le nofoaga ua faatino ai le latou auaunaga.
“Ua saunoa mai le faatamā e tuu pea sui ua o i o latou nuu ma aiga e fai ai le galuega, ae faamaopoopo taulasea o loo faamaoni mai i le matou mafutaga”, na saunoa mai ai le peresitene.
O fale Samoa o loo faaaogā i le galuega e le o atoatoa vaega e manaomia mo le faatinoina o le galuega a taulasea, ma ua faaalia e le peresitene o le a saili fesoasoani pea i le Malo mo se seleni e fausia ai se fale lelei e tapena ai vai, ma teu lelei ai vaega o loo faaaogā e taulasea i le fofoina o gasegase.
E leai foi se faleui e faaaogā e taulasea ma gasegase ma o vaega uma ia o loo taoto i fuafuaga auiluma a le asosi. Sa ave tusi aisi a le asosi i le fia maua o ni seleni, peitai na faaalia e le peresitene ua avatu le fautuaga a le faatamā, sa tatau ona tapa muamua o ia a o lei faia lea fuafuaga.
“O lea la ua taatia uma tusi aisi ua le toe aapa i ai le asosi”.