ANZAC a le Meadows Primary School

Ua taunuu le muagagana a le atunuu “E sosoo le fau ma le fau” ona o se vaiaso faigaluega pito i puupuu i le kalena faaletausaga le vaiaso na tuanai atu, lea na aso malolo o le Eseta le Aso Gafua, ae ANZAC le Aso Faraile.
Sa na o le Aso Lua e oo i le Aso Tofi na fai ai aoga faapea le tele o fale faigaluega, ae o nisi lava o galuega na malolo mai lava mo le Aso maliu faatasi ai ma le vaiaso atoa na tuanai atu.
Ae i le aoga tulagalua a le Meadows, e lei faatafa lava i la latou tautua masani i tausaga taitasi, o le faamanatuina lea o le ANZAC ma valaaulia ai mātua ma uo a le aoga aemaise o sui o le malo ma faalapotopotoga ina ia faailoa pea i tamaiti le tāua o le faamanatuina o le toto masaa o fitafita na sailiina le saolotoga.
O le itu matagofie i le faamoemoe o le Meadows, ona o le amanaia e sui faipule, sui o le fitafita, aemaise nisi o sui mualuluga e taumamao nofoaga, ae e taumafai lava e auai i tausaga uma, na mamalu ai ma matagofie le sila maimoa a le atunuu lautele, aemaise lava nisi o mātua ma uo Samoa a le aoga sa auai.