O le aso 1 o Iuni 2014 e atoa i ai le 150 tausaga talu ona to‘ai taunuu le aumalaga muamua mai Farani, o Tamaitai Sa o le ituaiga Misionare Tala‘i o Maria poo le SMSM. Ina ua taunuu nei tamaitai i Samoa ma faatūina loa le aoga tulagalua muamua ma o latou maota nonofo i Savalalo e pei ona oo mai i ona po nei.
Na amataina a latou galuega mo aoaoga i Upolu i Savalalo, Lotofaga, Falefa, Aleipata, Mulivai i Safata, Vaea, Leauvaa, Moamoa ma Leulumoega. O Savaii, o Fusi Safotulafai, Safotu ma Falealupo. O Tutuila o Lepua ma Leone ma le aoga maualuga e tasi i Upolu o St Mary’s College.
O le faamanatuina o le 150 tausaga o le aoga, o se tofa ua a‘e i le mafutaga i Samoa e tatau ona faamamalu lenei matatia maoa‘e ua oo i ai le SMSM, ma o lea sa fesootai mai ai i le afioga i le Tamaitaisa ia Sr Pele Peni mo lenei faamoemoe.
O le aso 30 o Novema i le tausaga 2013 na amata faamaopoopo ai le mafutaga i Niu Sila nei mo le resitalaina o suafa o i latou sa aoaoina i soo se aoga. O iina na fanau ma amatalia ai loa le mafutaga i Aukilani.
O le toatele o le mafutaga e fia auai i le atoaga o le 150 tausaga o le aoga, lea sa auautasi ai e faia ni sailiga tupe eseese mo le malaga i Samoa.
O le Aso Toonai, 26 o Aperila na faataunuuina ai loa le sailiga tupe i le maota o le ekalesia Katoliko i Onehunga.
Na amata le faamoemoe i le sauniga lotu na saunia e le afioga ia Patele Father Michael A. Endermann, ona tatala aloaia loa lea o faafiafiaga, o le afioga i le peresetene o le mafutaga ia Afamasaga Agnes Rasmussen na muamua i ai le amataina o ipu, ona faagasolo loa lea o le lautele o le mafutaga.
Na taualuga faafiafiaga o le aso i le Ipu a le faatina o le asosi a le SMSM le afioga ia Sister Maria Pelenatete o ia foi o le sui sooupu a Aukilani ma Samoa i le faamoemoe o le 150 tausaga. Na auai ai foi sui tuai o le aoga a Pesega faapea auaiga o le mafutaga e lagolago le faamoemoe.
Sa tauaao atu foi le meaalofa a le afioga ia Father Michael A. Endermann o ia o le sui o tama tuai o Sanele e soosoo tau‘au atu i le sailiga tupe a teine tuai o le St Marrys. Ua iai le faamoemoe o le a toe faia se isi sailiga tupe i se taimi o muamua a o lei tuuvaa atu i Samoa mo le faamoemoe.
O le saunoaga a le susuga i le failautusi le faletua ia Sinatala Masoe o le autu o nei sailiga seleni auā se meaalofa e tuuina atu i le mafutaga i Samoa, auā o loo iai le faamoemoe o le fia faaleleia o le Library ma se Computer Lab mo Vaimoso ma Savalalo.
O nei atinae uma e tāua tele mo le aoaoina o alo ma fanau a le atunuu. O le aso 30 o Me ua faamoemoe o le a taunuu uma ai le toatele i Samoa auā le faamantuina o le 150 tausaga o le St Marys.
