Lo‘u Agaga e, ia faamanu atu i le Alii lo‘u Atua, o mea uma foi o i totonu ia te au ia faamanūina ai lona Suafa Paia. O le mau foi a le faisalamo o Ieova, “O lo‘u papa ia ma lo‘u ‘olo, o lo‘u faaola ou te faatuatua ia te ia. A o le tagata e pei o le mutia ona aso, e pei o le fuga o le vao e faapea foi ona fuga mai o ia”. O lagona ia o le faagaeetia ua tatau ai le faamanū ma le faaneetaga e ave a‘e ai le viiga i le Atua, aemaise o le loto faafetai i le alofa ma le agalelei silisili ese o le Tamā oi le lagi, ina ua aulia manuia mai e si o matou tuaa matua, le tamā ia Savea Safatauafo‘i Li‘a, le 90 o tausaga o lona soifua i le aso Faraila, 25 o Aperila 2014.
O si o matou tamā matua ia Savea Safatauafo‘i, o ia o le toe ulutaia o si o matou nuu pele i Levi Saleimoa. i le paia lava lea i le susū mai alo o Malietoa ma le aiga Sa Tilialo faapea le mamalu o le Faletolu ma le ga‘utaala faapea lau Fetalaiga Luatua. Ae o se toe tagata matua foi o loo ona tausia le aiga i Levi Safatauafo‘i.
O Savea o se tamā galue malosi e lē faavaivai lava i soo se mea fai, ma e oo mai lava i le taimi nei o loo galue pea ia i tuamaota. E toasefulutasi ona alo ma e toatasi lava ua fai i lagi le tuligati‘a, ae o loo soifua pea le toasefulu. E momoli ai le faamalo tele ia te oe Tamā, faamalo le onosai. Faafetai i lau tatalo, faamalo i lau tautua lotu, faamalo tautua i lou nuu aemaise lava o lou aiga.
O le faamanatuina o le aso soifua o le tamā ia Savea sa tapenaina ma saunia lelei lava e nai ona alo ma ona aiga ma faataunuuina ai le faamoemoe i se sauniga lotu na taitaia e le Afioga Patele Felise Lemi, na faamua ai foi ona momoli laau i fogaa e sulaina le tausiga alofa a le Atua i le tamā ma lona soifua laulelei pei ona ua aulia mai ai le 90 o ona tausaga, ma o se matatia foi lea i totonu o si ona aiga, le faamanatuina o le soifua auauna o le tamā ina ua faamanuia le Atua i lona soifua.
O le ulumatua o alo o le tamā matua, le afioga ia Savea Tanuli sa na faafeiloai le auvalaaulia ma faagasolo le polokalame o le faamoemoe, aemaise foi o le tali faaaloalo na momoli ai le faafetai i le auvalaaulia e tusa ma lo latou auai e molimauina le faamanatuina o le aso soifua o le tamā, aemaise foi o le lagolagosua a le afioga ia Seumanutafa Silupe.
Ona saunoa mai foi lea o le afioga ia Peseta Tele‘a o le sui o le auvalaaulia na ia momoli ai le faamalo i aiga uma o le tamā matua auā le faataunuuina o le faamoemoe ina ua matagofie mea uma ma faafoi ai lea le viiga o le Atua, ona ta‘ape ai foi lea o le fuamanusina ma le mama ua lomi ma le vaa ua goto ma le fiafia ma le faafetai tele auā ua matagofie ma lelei mea uma i le alofa faatasi mai o le Atua.
Si o matou tamā matua peleina, Savea Safatauafo‘i Li‘a, o moomooga alofa ma faamanuiaga mo oe e lē uma.
O la matou tatalo faifai pea i le Atua ia na alofagia lou soifua ia saga faaopoopoina pea nisi aso ma nisi tausaga se tele i le lumanai tatou te saga mafuta ai pea i lenei olaga lē tumau. Ia saga faaaogāina pea lou soifua e te auauna ai i le finagalo ma le galuega a le Atua i soo se mea lava. Ia manuia tele lou aso soifua tamā.
Faamanuiaga na mai lau fanau uma, ma fanau a au fanau uma lava i Aotearoa nei ma Samoa. Alofaaga mai ia Lafi ma le fanau: Savea Tanuli & Lakena ma le fanau; Seumanufata Silupe & Mata ma le fanau; Lotu & fanau, Kili, Lia, Saili & fanau; Malivao & Faatafe ma le fanau; Kaisa & fanau ia Luaipouomalo Laufili & fanau; Lealofisa & Demi Epati.
