O laufofoga fiafia o le faafeagaiga ia Vaoga Vine i le Aso Toonai, 26 o Aperila a o faamanatu le atoaga o lona 50 tausaga, na avea lea ma lagona fia molimau o sui o lana ekalesia ma lana fanau i lona soifua galue ma ana galuega lelei o loo faia i totonu o lona aiga faapea le tovine a le Atua o loo la tausia ma le faletua ia Makerita.
O le susuga i le faafeagaiga ia Tauiliili Pio mai le AOG i Botany na saunia le lotu faafetai ma le faamalosi i lana auauna ma le mamalu o le auvalaaulia na latou molimauina le aso soifua o le susuga i le faafeagaiga. Na mae‘a le sauniga ona tuu lea o le avanoa i le auauna a le Atua i sana molimau i lona soifua galue.
Na ta‘ua i lana saunoaga le afioaga o Falealupo na soifua mai ai, faatasi ai ma lana faamalosi i le tagata ae ava i le Atua, e faalevalevaina ai aso o lona soifua. Na sosoo ma le feulaina o le keke ma tuu loa le avanoa i le mamalu o le auvalaaulia poo ai e fia fai sana molimau e tusa ma le latou mafutaga ma le auauna a le Atua.
Sa maua foi le avanoa o le uso matua o le faafeagaiga le susuga ia Fonoti Olotise e saunoa ai i le la mafutaga ma lona uso a o la mafuta faatasi i totonu o le latou aiga. Sa taualuga molimau o lea aso i aitema na saunia e alo o le faafeagaiga e momoli ai o latou alofaaga ma faamanuiaga i le aso soifua o le latou tamā.
O le susuga ia Leo Faumuina sa fai ma fofoga o le aso e faafeiloai le auvalaaulia ma faasoa le polokalame i le aso atoa. O ia foi sa fai ma sui o le aiga e momoli faaaloaloga mo le susuga i le faafeagaiga ma le paia o le ekalesia sa mafuta atu e patipatia faatasi le 50 tausaga o le faafeagaiga.
O le susuga ia Vaoga Vine Faausuusu ma le faletua ia Makerita o loo galulue nei i le tausiga o le lafu mamoe o “Iesu le Tali” i Manurewa.
