O se faasalalauga lea a le alii Palemia, ina ua toe tāpā ai e tusitala o le atunuu sona finagalo i le mataupu lea ua laga ai atugaluga o le Fono Soofaatasi a Ekalesia i Samoa le NCC i le fuafuaga a le Malo e faamautu ni laisene se lua mo ni faletalimalo e talia talosaga, ina ia fausia ai fale o masini poka tupe poo casinos i le faaiuga o le tausaga nei.
O le mau a le susuga Kasiano Leaupepe, le Afioga lea i le Taitaifono o le NCC, o se faiga lenei o le a atili ai ona vaaia le ola mativa i totonu o Samoa.
O le finauga a le Malo, ua mae‘a lava ona faalauiloa atu o le a faatulafonoina le tapu o tagatānuu o Samoa ona taaalo ai i ia masini poka. Na o i latou lava e umia tusifolau e ese mai i tusifolau Samoa o le a faataga ona taaalo ai.
O le taulai a le Malo e pei ona toe faamanatu mai e le Alii Palemia, o le faatosina mai ai o tupe o loo malaga mai tagata asiasi mai ma faamautu i faletalimalo nei.
O se auala e atinae ai foi nisi o nofoaga mo faafiafiaga mo ia tagata e tafafao mai i Samoa.
Faaalia e le alii Palemia o lea e lua laisene e lē o soona faatutuina ia nofoaga ae o lana finauga i le faaiuga o lenei vaiaso, afai la ua iai le manatu o le fono a ekalesia lotu e taofi casino, e tatau foi la ona silasila loa i se tulafono e matuā faasā ai loa soo se taaloga sue tupe e pei o le Bingo lea e tele lava aulotu o loo faatautaia auā sailiga tupe mo le atinae i totonu o ekalesia.
E le gata i lea o le taofi o lulu ia foi e faaaogā i sailigatupe, o soo se petipetiga lava e tatau loa ona faasā uma. Faaalia e le alii Palemia o le pulea foi o tupe o le a aoina i casino nei, o le a tuu atu i le Komiti Faafoe o Petipetiga i Samoa le TAB, ma o i latou nei o le a mafai ona faaaogā le tupe lea e maua mai i ia auala o faafiafiaga mo le faatupega o atinae o taaloga e pei ona faia nei e le TAB i tausaga taitasi i ‘au eseese a le atunuu ua moomia se seleni auā le masii atu ai i fafo mo tausinioga faavaomalo aemaise i le Manu Samoa e pei ona faamoemoe i ituaiga seleni faapenei e aoina mo alauni, o le malaga atu ai ma faamautu i atunuu mamao o loo faia ai ia tausinioga.
Ta‘ua e le alii Palemia e le o malamalama pe aisea ua faamalamalama gata ai lea mataupu ae o lea ua agai le malo e ala i tulafono e matuā tuuitiitia ituaiga atugaluga e pei ona lāgā e le Fono Soofaatasi a Ekalesia lotu i Samoa ae e foliga mai e le o malamalama lava i latou o loo lagalaga pea lea mataupu.
E tele faletalimalo o loo mautinoa le Malo e talosaga nei mo se laisene ina ia mafai ona fausia casino i totonu o ia fale tetele.
Ua faalauiloa foi se finagalo o se kamupani mai i Hawaii ina ia mafai ai ona fausia ni masini faapea ma o le kamupani lea a le alii e suafa ia “Jesse James” lea ua ia faalauiloa o le tausaga fou e amata ai loa ona sua nofoaga o le afioaga o Sasina lea ua sainilima e faaaogā mo se faletalimalo tele ma isi atinae tau tagata tafafao mai i lea itu o Savaii.
